ភ្នំពេញ៖តាមបណ្តាផ្លូវកែងភ្លើងស្តុប និងលើដងវិថីសំខាន់ៗមួយចំនួនក្នុងរាជធានីភ្នំពេញ ត្រូវបានបំពាក់ម៉ាស៊ីនថតជាង ២០០គ្រឿង(កាមេរ៉ា សុវត្ថិភាព) ដើម្បីត្រួតពិនិត្យរាល់សកម្មភាពដែលមានលើដងផ្លូវរួមមាន បទល្មើសចរាចរណ៍ និងបទល្មើសនានាដែលកន្លងមកធា្លប់កើតមានជាញឹកញាប់ តែសមត្ថកិច្ចមិនអាចស្វែងរកភស្តុតាងជាក់លាក់បាន។
សាលារាជធានីភ្នំពេញបានប្រកាសជាផ្លូវការថា ចាប់ពីថ្ងៃទី ២២ ខែធ្នូ ឆ្នាំ២០១៥ នេះតទៅ តាមភ្លើងស្តុបលើដងវិថីសំខាន់ៗ ក្នុងរាជធានីភ្នំពេញ ត្រូវបានបំពាក់កាមេរ៉ាសុវត្ថិភាព ជាង ២០០ គ្រឿង ដើម្បីតាមដានបទល្មើសនានា។
ក្រោយពីទទួលបានដំណឹងនេះ ប្រជាពលរដ្ឋគ្រប់មជ្ឈដ្ឋានបានសំដែងការស្វាគមន៍ចំពោះគម្រោងនេះ ដោយរំពឹងទុកថានឹងជួយពង្រឹងសន្តិសុខបានខ្ពស់ជាងមុន ហើយក៏ងាយស្រួលតាមដានរាល់សកម្មភាពប្រព្រឹត្តបទល្មើសនានា ដែលជាកត្តាចម្បងក្នុងការរក្សាសន្តិសុខក្នុងរាជធានីភ្នំពេញ៕ដោយ៖រដ្ឋា
