គ្លីនិកសម្ពោធថ្មី Fertility Clinic Cambodia ដែលចំណាយដើមទុនជាង១លានដុល្លារជួយបំបាត់កង្វល់ស្វាមីភរិយាដែល គ្មានលទ្ធភាពមានគភ៌តាមធម្មជាតិ ដោយផ្ដល់ជំនួយផ្នែកវិទ្យាសាស្ត្រឲ្យពួកគេអាចបង្កកំណើតបានដោយជោគជ័យ។
កាលពីប៉ុន្មានសប្ដាហ៍កន្លងទៅ គ្លីនិកដែលបានបើកទ្វារមិនដល់មួយខែនេះ បានប្រតិបត្ដិការបង្កកំណើតកូនតាមបែបសិប្បនិម្មិត (IVF) ក្នុងប្រទេសកម្ពុជាលើកទីមួយ។
លោក ហោ សំណាង ជានាយកប្រតិបត្ដិ និងជាសហស្ថាបនិកគ្លីនិកនេះបាននិយាយថា៖ «ខ្ញុំជឿថា វាគឺជាឱកាសដ៏ជោគជ័យ។ ភាពអស្ចារ្យនៃការភ្ញាស់មេជីវិតក្រៅស្បូនក្នុងប្រទេសកម្ពុជាកំពុង តែចាប់ផ្ដើម»។
លោក និងលោកស្រីវេជ្ជបណ្ឌិត ស៊ាន សុខទៀង ជាភរិយាបានបង្កើតនូវមន្ទីរពិសោធន៍នាំចូលម៉ាស៊ីនបច្ចេកវិទ្យាខ្ពស់ បំផុតមកកម្ពុជាដើម្បីឆ្លើយតបនឹងវិបត្ដិរបស់គូស្វាមីភរិយាដែលមាន វ័យកាន់តែជ្រេ។
លោក ហោ សំណាង បានឲ្យដឹងថា៖ «សម្រាប់បន្ទប់ពិសោធន៍នេះ យើងមានសេវាដូចជា ទី១ធ្វើការវិភាគមូលហេតុដែលបង្កឲ្យលំបាកក្នុងការមានកូន។ ទី២ការបង្កកំណើតនៅក្រៅស្បូនរួចហើយ ទើបចាក់ចូលក្នុងស្បូនម្តាយវិញមានធុងសម្រាប់រក្សាពងមេជីវិតញី របស់ស្ត្រី។ ទី៣មានការប្រឹក្សាយោបល់ជាមួយឪពុកម្តាយដែលមានជំងឺឆ្លងពីគាត់ ទៅដល់កូន និងសេវាកម្មជាច្រើនទៀត»។
លោកបានបន្ដថា៖ «ការភាន់ច្រឡំមួយដែលយើងបានជួបជាញឹកញយគឺថា អ្នកខ្លះគិតថា យើងផលិតក្មេង។ យើងមិនធ្វើដូច្នោះទេ»។
វិធីពពោះចាក់មេជីវិតភ្ញាស់ក្នុងកែវនេះត្រូវបានអនុវត្ដតាំងពី ឆ្នាំ១៩៧៨។ ស៊ុតត្រូវបានប្រមូលមកពីម្ដាយ ហើយធ្វើការផ្សាំក្នុងមន្ទីរពិសោធន៍មុនពេលអំប្រ៊ីយ៉ុងដ៏ល្អបំផុត ចំនួន២ឬ៣ធ្វើដំណើរទៅក្នុងស្បូន នឹងអាចបង្កឲ្យមានផ្ទៃពោះដោយជោគជ័យ។
អ្នកស្រី ចាន់រ៉ា វ័យ៣៣ឆ្នាំ ជាអ្នកមកទទួលសេវាកម្មនេះ បាននិយាយថា៖ «ខ្ញុំរំភើបណាស់ និងអន្ទះសារង់ចាំពេលនេះជាយូរមកហើយ»។
អ្នកស្រី និងស្វាមីបានរៀបការរយៈពេលជាង៤ឆ្នាំហើយ ប៉ុន្ដែទោះបីជាពួកគេខិតខំរិះរកវិធីយ៉ាងណាក៏ដោយ ក៏អ្នកស្រីមិនអាចមានផ្ទៃពោះឡើយ។ អ្នកទាំងពីរបានជួបប្រឹក្សាជាមួយវេជ្ជបណ្ឌិតនៅសិង្ហបុរី និងថៃជាដើម ព្រមទាំងទទួលការព្យាបាលដោយប្រើឱសថជំនួយ និងតាមដានរដូវជាប្រចាំនៅតែគ្មានលទ្ធផលទាំងអស់។
អ្នកស្រីបានបង្ហើបប្រាប់ថា៖ «ការព្យាបាលនៅបរទេសត្រូវចំណាយខ្ពស់ណាស់។ យើងត្រូវចាយលើការហោះហើរ ការស្នាក់នៅ ម្ហូបអាហារ និងការធ្វើដំណើរ។ នៅទីនេះ ខ្ញុំជជែកជាមួយវេជ្ជបណ្ឌិតជាភាសាខ្មែរតែម្ដង។ ខ្ញុំមានអារម្មណ៍ផាសុកភាពក្នុងប្រទេសកំណើត ហើយក្រុមគ្រួសាររបស់ខ្ញុំអាចនៅកំដរខ្ញុំជាប់ជានិច្ច»។
ការបង្កកំណើតក្នុងកែវមុននឹងផ្ទេរអំប្រ៊ីយុងចូលស្បូនម្ដាយវិញ នោះ នៅប្រទេសថៃមានតម្លៃប្រមាណ៩ពាន់ដុល្លារ ខណៈអូស្ដ្រាលី និងអាមេរិកមានតម្លៃ១២៥០០ដុល្លារ។ ដោយឡែកនៅកម្ពុជាតម្លៃនេះស្ថិតនៅចន្លោះ៤៧០០ទៅ៦០០០ដុល្លារ។
ថ្វីដ្បិតតែការភ្ញាស់មេជីវិតក្នុងកែវគឺជាការព្យាបាលដ៏ពេញនិយម បំផុត តែវាក៏មិនមែនជាដំណោះស្រាយតែមួយមុខចំពោះបញ្ហាបន្ដពូជនេះទេ។
ក្នុងចំណោមអតិថិជនរបស់លោកដែល៩០ភាគរយគឺជនជាតិខ្មែរគ្រប់ ស្រទាប់វណ្ណៈនោះ លោកបានកត់សម្គាល់ថា៖ «ការព្យាបាលឲ្យមានកូនមិនសុទ្ធតែចំណាយខ្ពស់ទាំងអស់នោះទេ។ យើងមានវិធីសាស្ដ្រផ្សេងៗចំពោះស្វាមីភរិយាខុសៗគ្នា។ អ្នកខ្លះអាចមានលទ្ធភាពពពោះតាមបែបធម្មជាតិដោយគ្រាន់តែជួយឲ្យមាន រដូវទៀងទាត់វិញប៉ុណ្ណោះ»។
ខណៈកម្ពុជាមិនមានស្ថិតិច្បាស់លាស់អំពីបញ្ហាដែលឪពុកម្ដាយមិន អាចមានកូន តួលេខជាសកលបានប៉ាន់ប្រមាណថា ១ក្នុងចំណោមស្វាមីភរិយា៦គូជួបបញ្ហាគ្មានផ្ទៃពោះនេះ ហើយនៅក្នុងបណ្ដាប្រទេសដែលប៉ះពាល់ខ្លាំង ប្ដីប្រពន្ធរហូតដល់២៥ភាគរយមិនអាចមានគភ៌បាន៕ ប្រភព ៖ប៉ុស្តិ៍ខ្មែរ
រូបតំណាង : កម្ពុជានឹងស្វាគមន៍កំណើតទារកប្រសូតដោយការប្រើវិធីភ្ញាស់មេជីវិតក្រៅស្បូនដំបូងបង្អស់
លោកស្រីវេជ្ជបណ្ឌិត សុខទៀង ពិនិត្យមើលស្បូនអ្នកជំងឺ។ Charlotte Pert
អ្នកជំនាញបរទេសធ្វើការពិនិត្យមេជីវិត ។ Charlotte Pert
