ភ្នំពេញ៖ ជើងមនុស្សមួយកំណាត់ត្រឹមក.ជើងចុះក្រោមត្រូវគេប្រទះ ឃើញ នៅក្នុងធុងសំរាមស៊ីនទ្រីនៅមុខមន្ទីរពេទ្យព្រះកុសុមៈ ហៅមន្ទីរ ពេទ្យលោកសង្ឃក្នុងសង្កាត់ទឹកល្អក់ទី២ ខណ្ឌទួលគោក បង្កឲ្យមានភ្ញាក់ផ្អើលយ៉ាងខ្លាំងកាលពីវេលាម៉ោងប្រមាណ៩ព្រឹក ថ្ងៃទី៨ ខែតុលា ឆ្នាំ២០១៤នេះ។
ប្រធានមន្ទីរពេទ្យព្រះកុសុមៈ ដែលគេស្គាល់ថាឈ្មោះ សេក សុខឃឿន និងបុគ្គលិកមន្ទីរពេទ្យ ត្រូវគរិះគន់យ៉ាងខ្លាំង ចំពោះប្រការដែលគ្មានការទទួលខុសត្រូវ ខ្វះក្រមសីលធម៌ និងគ្មានមនុស្សធម៌ក្នុងឋានៈជាគ្រូពេទ្យសង្គ្រោះជីវិតមនុស្ស ឡើយ។
បន្ទាប់ពីមានការភ្ញាក់ផ្អើលភ្លាមៗនោះគេសង្កេតឃើញកម្លាំងនគរបាលមូលដ្ឋានប៉ុស្ដិ៍ទឹកល្អក់ទី២ ឬកម្លាំងព្រហ្មទណ្ឌខណ្ឌទួលគោក និងគ្រូពេទ្យបានចុះទៅពិនិត្យ និងស៊ើបសួរទើបដឹងថាជាជើងរបស់ស្ត្រីអ្នកជំងឺម្នាក់ដែលត្រូវក្រុមគ្រូពេទ្យកាត់ចេញដោយសារមានស្នាមដំបៅធ្ងន់ធ្ងរខណៈមានជំងឺទឹក នោមផ្អែម ហើយព្យាបាលមិនជា។
សាច់ញាតិបានបញ្ជាក់ប្រាប់សមត្ថកិច្ចថា ស្ដ្រីរងគ្រោះឈ្មោះ ឡេង ទូច អាយុ៧២ឆ្នាំ មានស្រុកកំណើតនៅខេត្ដកណ្ដាល មានជំងឺទឹកនោមផ្អែម ហើយកើតដំបៅនៅជើងខាងឆ្វេងព្យាបាលមិនជាសះស្បើយទេដែលតម្រូវឱ្យក្រុមគ្រូពេទ្យសម្រេចកាត់ចេញត្រឹមក.ជើងកាលពីព្រឹកថ្ងៃទី៧ខែតុលា កន្លងមកនេះ។
ប្រភពនបន្តថា ក្រោយពីកាត់ជើងរួចហើយកូនរបស់ជនរងគ្រោះបានយកជើងម្ដាយរបស់ខ្លួនទៅដាក់ចោលក្នុងធុងសំរាមដោយពុំមានការរុំបិទជិតនោះទេ ដូច្នេះទើបធ្វើឱ្យមានការភ្ញាក់ផ្អើលនៅពេលប្រទះឃើញជើងមនុស្សដែលនាំឱ្យសង្ស័យថាជាអំពើឃាតកម្ម។
ប្រជាពលរដ្ឋបានចាត់ទុកថា រឿងនេះជាកំហុសរបស់គ្រូពេទ្យ ពិសេសគឺប្រធានមន្ទីរពេទ្យដែលមិនបានយកចិត្ដទុកដាក់ចំពោះការវេចខ្ចប់សំណល់វេជ្ជសាស្ត្រប្រគល់ឲ្យសាច់ញាតិអ្នកជំងឺយកជើងទៅបោះចោលដោយខ្លួនឯងពាសវាលពាសកាលគ្មានអនាម័យត្រឹមត្រូវ ។
គួរជម្រាបថា អង្គភាពកម្ទេចកាកសំណល់វេជ្ជសាស្ត្រត្រូវបានបង្កើតឡើងជាច្រើនឆ្នាំកន្លងមកហើយ ស្ថិតនៅក្រោមការគ្រប់គ្រងរបស់គណៈកម្មាធិការសាខាកាកបាទក្រហមកម្ពុជារាជធានីភ្នំពេញ។សាលារាជធានីភ្នំពេញក៏ធ្លាប់បានធ្វើសេចក្តីជូនដំណឹងណែនាំដល់គ្រប់មន្ទីរពេទ្យរដ្ឋ គ្លីនិកឯកជន ឬក្រុមហ៊ុនឯកជនដែលធ្វើអាជីវកម្មផ្នែកឱសថឲ្យយល់ដឹងពីការវេចខ្ចប់កាកសំណល់វេជ្ជសាស្ត្រដូចជា ស៊ីរ៉ាំង ឱសឋខូចគុណភាព សំណល់ពីការវះកាត់ ,ពីការសម្រាលកូន ។ល។ ហើយបានតម្រូវឲ្យបញ្ជូនទៅឲ្យអង្គភាពកម្ទេចសំណល់វេជ្ជសាស្ត្ររបស់សាខាកាកបាទក្រហមរាជធានីភ្នំពេញ ដើម្បីកម្ទេចចោលដោយឧបករណ៍បច្ចេកទេស មិនប៉ះពាល់សុខភាព និងបរិស្ថាន ៕ រដ្ឋា
