ត្បូងឃ្មុំ៖ បុរសម្នាក់បានស្លាប់ភ្លាមៗនៅកន្លែងកើតហេតុ និងស្ត្រីជាប្រពន្ធបានរងរបួស ខណៈបុរសជាប្តីដែលស្លាប់នោះ បានយកធ្យូងថ្មពិលចាស់ៗកិនបញ្ចូលគ្នាដោយត្បាល់កិន ម្សៅ កិនលាយជាមួយធ្យូងដែលដុតចេញពីដើមឈើព្រាល ហើយបង្កឲ្យផ្ទុះឡើង បណ្តាលឲ្យប្តីស្លាប់ និងប្រពន្ធរងរបួសតែម្តង។
តាមរបាយការណ៍សមត្ថកិច្ចបានឲ្យដឹងថា ករណីផ្ទុះស្លាប់មនុស្សខាងលើនេះ កើតឡើងនៅវេលាម៉ោង១៣ៈ០០នាទី ថ្ងៃទី ៦ ខែមករា ឆ្នាំ២០១៦ នៅភូមិកន្សោមសត្វ ឃុំកក់ ស្រុកពញាក្រែក ខេត្តត្បូងឃ្មុំ ។
ប្រភពបញ្ជាក់ថា ការផ្ទុះនេះមូលហេតុមកពីបុរសរងគ្រោះបានយកធ្យូងថ្មពិល ទៅកិនលាយជាមួយធ្យូងដើមឈើព្រាល ដែលទំនងជាចង់ច្នៃធ្វើអ្វីម្យ៉ាង ប៉ុន្តែវាបែរជាផ្ទុះឡើងបណ្តាលបុរសដែលធ្វើនោះរងរបួសយ៉ាងធ្ងន់ធ្ងររហូតដល់ស្លាប់នៅនឹងកន្លែងដោយសារអំបែងនៃកម្ទេចថ្មត្បាល់កិននោះខ្ទាតត្រូវ។ចំណែកស្ត្រីជាប្រពន្ធបានរងរបួសស្រាលលើជង្គង់។
ជនរងគ្រោះជាប្តីដែលស្លាប់ឈ្មោះ ឆាន យ៉ាត អាយុ ៥៧ឆ្នាំ និងស្ត្រីជាប្រពន្ធឈ្មោះ ហ៊ូ សឺ អាយុ ៥៥ឆ្នាំ អ្នកទាំងពីរនាក់រស់នៅភូមិឃុំកើតហេតុ។
បើតាមសំដីស្ត្រីជាប្រពន្ធបានឲ្យដឹងថា ខ្លួនមិនបានដឹងច្បាស់ថាប្តីរបស់ខ្លួនមានបំណងអ្វីនោះទេ ប៉ុន្តែជារៀងរាល់ថ្ងៃប្តីរបស់ខ្លួនតែងតែដើរប្រមូលយកថ្មពិលចាស់ៗមករក្សាទុក ហើយនៅថ្ងៃកើតហេតុគាត់(ប្តី)បានយកថ្មពិលទាំងនោះឆ្កឹះយកធ្យូង ទៅកិនលាយជាមួយធ្យូងដែលដុតបានពីដើមឈើព្រាល(ស្រដៀងវល្លិ៍)ដោយប្រើត្បាល់កិនម្សៅ ក៏ស្រាប់តែផ្ទុះកក្រើកយ៉ាងខ្លាំងបែកថ្មត្បាល់កិនខ្ទេច ហើយខ្ទាតបំណែកថ្មត្រូវក្បាលគាត់(ប្តី)បែកលលាដ៍ និងចំកន្លែងផ្សេងទៀតបណ្តាលឲ្យរងរបួស និងស្លាប់តែម្តង។
សមត្ថកិច្ចមិនបានបញ្ជាក់ពីមូលហេតុដែលបណ្តាលឲ្យផ្ទុះដោយគ្រាន់តែយកធ្យូងថ្មពិលទៅកិនលាយជាមួយធ្យូងឈើធម្មតានោះទេ។ក្រោយពីធ្វើកោសល្យវិច្ច័យរួចហើយសមត្ថកិច្ចបានប្រគល់នាទីឲ្យក្រុមគ្រួសារជនរងគ្រោះរៀបចំធ្វើពិធីបុណ្យសពតាមគន្លងប្រពៃណី៕ដោយ៖សុផល
