ខេត្តកំពត៖កម្លាំងកងរាជអាវុធហត្ថខេត្តកំពត នៅវេលាម៉ោង ៩ះ៤០នាទីព្រឹកថ្ងៃទី១០ ខែមករា បានសហការជាមួយកម្លាំងកងរាជអាវុធហត្ថ ស្រុកកំពង់ត្រាច ចុះបង្ក្រាបសង្វៀនជល់មាន់ដែលលួចបើកលេងយូរហើយ នៅភូមិកោះស្នា ឃុំឬស្សីស្រុក ខាងលិចស្រុកកំពង់ត្រាច ខេត្តកំពត។
ប្រជាពលរដ្ឋនៅក្បែរកន្លែងកើតហេតុ បានអោយដឹងថា ក្នុងការបង្ក្រាបល្បែងស៊ីសងខាងលើនេះ មានការផ្ទុះអាវុធជាច្រើនគ្រាប់ ធើ្វអោយមានការភ្ញាក់ផ្អើលដល់ប្រជាពលរដ្ឋជិតខាង។
សមត្ថិកិច្ចនៅទីនោះបានអោយដឹងទៀតថា ក្នុងការចុះបង្ក្រាបនេះ ដឹកនាំដោយលោក ខៃ សម្ភស្ស ព្រះរាជអាជ្ញារង ខេត្តកំពត។
សមត្ថកិច្ចមូលដ្ឋានម្នាក់សូមមិនបញ្ចេញឈ្មោះ លួចខ្សឹបដាក់ត្រចៀកអ្នកយកព័ត៌មានថា ការបង្ក្រាបសង្វៀនជល់មាន់នេះឃាត់មនុស្សបានចំនួន៥នាក់ ម៉ូតូ២៦គ្រឿង ស៊ុម១៣ និងអាគកមួយចំនួនទៀត។
ប្រភពដដែលបន្តទៀតថា ដោយសារតែម្ចាស់សង្វៀនបង់លុយឲ្យតែអ្នកផ្សេង មិនបង់លុយដាក់ខែឲ្យក្រុមសមត្ថកិច្ចប៉េអឹម ទើបបានជាកម្លាំងប៉េអឹមស្រុកកំពង់ត្រាច រាយការណ៍ទៅខេត្ត ហើយប៉េអឹមខេត្តរាយការណ៍ទៅព្រះរាជអាជ្ញា បានឈានដល់ការចុះបង្ក្រាបនេះ បើម្ចាស់សង្វៀន បង់លុយកាក់អោយប៉េអឹម នៅស្រុក និងខេត្ត នោះព្រះរាជអាជ្ញាគ្មានដឹងរឿងនេះបន្តិចសោះ៕ ដោយ៖ អ.វ៉ឹង
