ខេត្តកោះកុង៖មជ្ឈដ្ឋានខ្លះនៅច្រកទ្វារអន្តរជាតិចាំយាម ខេត្តកោះកុង បានកត់សម្គាល់លើការនាំចូលទំនិញជាច្រើនប្រភេទពីប្រទេសថៃចូលមកកម្ពុជាថា មានការឃុបឃិតគ្នាក្នុងការចុះបញ្ជីគៃបន្លំប្រាក់ពន្ធ និងមិនបាច់បង់ពន្ធចូលរដ្ឋ។
ការចោទប្រកាន់នេះបានលេចឮឡើងនៅបន្ទាប់ពីលោក សំ កុសល ប្រធានស្នាក់ការសាខាគយទើបឡើងកាន់តំណែងថ្មីរហូតមកដល់ពេលនេះ ។ប៉ុន្តែប្រភពខ្លះបានលើកឡើងថា ការរិះគន់នេះដោយសារកាច់កុងគ្នាក្នុងការងារ។
នៅច្រកទ្វារអន្តរជាតិព្រំដែនចាំយាម និងប៉ាក់ខ្លង នៃខេត្តកោះកុងមួយរយៈចុងក្រោយនេះ គេឃើញមានខ្សែរថយន្តដឹកជញ្ជូនទំនិញធុនធ្ងន់បើកឆ្លងចូលមកទឹកដីកម្ពុជាយ៉ាងគគ្រឹកគគ្រេងស្ទើររាល់ថ្ងៃ។ការនាំចូលមានចំនួនតិច ឬច្រើននោះវាមិនសំខាន់ទេ ប៉ុន្តែរឿងដែលសំខាន់នោះគឺការឃុបឃិតគ្នាគៃបន្លំប្រាក់ពន្ធដែលត្រូវបានមជ្ឈដ្ឋានមួយចំនួន និងមន្ត្រីនៅច្រកទ្វារជាមួយគ្នានេះដាក់ការសង្ស័យទៅលើលោកប្រធានសាខាគយថា បានចុះបញ្ជីបន្ធូរបន្ថយពន្ធដើម្បីបានសល់ប្រាក់លម្អៀងទុកចែកគ្នាច្រកហោប៉ៅ។
ទាក់ទិននឹងករណីនេះ មន្ត្រីប្រចាំការច្រកចាំយាមមួយរូបសុំមិនបញ្ចេញឈ្មោះបានបញ្ជាក់ថា រថយន្តដឹកទំនិញទាំងនោះ គេដឹកទៅដាក់នៅឃ្លាំងមួយស្ថិតនៅផ្នែកខាងក្រោយផ្សារថ្មីជាប់នឹងព្រំដែន។ បន្ទាប់មកទើបគេធ្វើសកម្មភាពផ្ទេររថយន្តពីមួយទៅមួយ នៅខាងក្នុងទីតាំងនោះដោយហាមឃាត់យ៉ាងតឹងរ៉ឹងមិនអោយអ្នកសារព័ត៌មានណាម្នាក់ចូលយកព័ត៌មាន និងថតរូបនោះឡើយ។ដោយសារតែមានភាពអាថ៌កំបាំងបែបនេះ ទើបមជ្ឈដ្ឋានមួយចំនួនដាក់ការចោទប្រកាន់មេគយលោក សំ កុសល ថាបានពាក់ព័ន្ធ នឹងអំពើពុករលួយរឿងទំនិញគេចពន្ធ។
ប្រភពបន្តថា ទំនិញទាំងនេះត្រូវបាននាំចូលដោយក្រុមហ៊ុនមួយ(សុំលាក់ឈ្មោះសិន)ហើយក៏មានការហូរចូរតាមច្រកប៉ាក់ខ្លង មកឡើងនៅចំណុចភូមិ ៤ និងភូមិ ២ ជាប់តំបន់វ៉ៃបុកចាស់ក៏មានច្រើនណាស់ដែរ ។
ប្រភពដដែលបន្តថា គ្រប់មុខទំនិញដែលថៅកែភាគច្រើននៅកោះកុងនាំចូលមានមួយចំនួនបានចុះបញ្ជីដោយបន្លំប្រាក់ពន្ធ និងមួយចំនួនទៀតគេចពន្ធទាំងស្រុងក៏មាន។
ប្រភពដដែលនេះបានសួរអ្នកយកព័ត៌មានដោយចំអកថា លោកជាអ្នកកាសែតដឹងទេថា តើនៅច្រកចាំយាម មានមន្ត្រីណាខ្លះដែលមានសិទ្ធិសម្រេចក្នុងការអនុញ្ញាតឲ្យនាំទំនិញចេញ ចូល ដោយចុះបញ្ជីលើកលែងការបង់ពន្ធ ឬបន្ធូរបន្ថយពន្ធ ដើម្បីសល់លុយដែលលម្អៀងទុកចែកគ្នាច្រកហោប៉ៅ ? ។
ដើម្បីឆ្លើយតបចំពោះការរិះគន់ខាងលើ នៅព្រឹកថ្ងៃទី១៣ ខែមករា នេះ មេគង្គប៉ុស្តិ៍ បានព្យាយាមទាក់ទងលោក សំ កុសល ប្រធានស្នាក់ការសាខាគយ ដែរ ប៉ុន្តែមិនអាចភ្ជាប់ប្រព័ន្ធទូរស័ព្ទដើម្បីសុំការឆ្លើយតបបានទេ៕ ដោយ៖សហការី
