បាល់ទាត់៖ខណៈដែលក្លិបធំៗមួយចំនួននៅតំបន់អឺរ៉ុបចង់បានតារាជើងស៊ុត Romelu Lukaku ក្លិប Everton បានដំឡើងថ្លៃតារារូបនេះកប់ពពក ប្រមាណ៦៤លានផោន។ នេះបើយោងសារព័ត៌មាន The Sun។
ការដំឡើងថ្លៃនេះដោយសារក្រុមដែលស្ថិតនៅលេខ១១ក្នុងតារាងក្របខ័ណ្ឌកំពូលអង់គ្លេសមួយនេះ ចង់រក្សាទុកខ្សែប្រយុទ្ធស្បែកខ្មៅវ័យ ២២ឆ្នាំ នៅទឹកដី Goodison Park តទៅទៀត បន្ទាប់ពីបង្ហាញទម្រង់លេងគួរឲ្យភ្ញាក់ផ្អើលនៅរដូវកាលនេះ។
តាមប្រភពព័ត៌មានខាងលើបានបញ្ជាក់ថា ក្រៅពី Man Utd នៅមានបណ្តាក្លិបធំៗមួយចំនួនទៀត ចង់បាន Lukaku ដែរ ដូចជា Real Madrid, Paris Saint-Germain, Manchester City និង Chelsea ជាដើម។
គួរបញ្ជាក់ថា ខ្សែប្រយុទ្ធបែលហ្សិករូបនេះ ត្រូវ Everton ទិញដាច់ពី Chelsea ក្នុងតម្លៃកំណត់ត្រាក្លឹប ២៨លានផោន នៅឆ្នាំ២០១៤ ហើយរដូវកាលនេះគេស៊ុតបញ្ចូលទី១៩គ្រាប់នៅគ្រប់កម្មវិធីប្រកួត៕
