ខេត្តក្រចេះ៖ ជនសង្ស័យចំនួន៤នាក់ ដែលជាប់ពាក់ព័ន្ធករណីបាញ់ សម្លាប់អ្នកកាសែតម្នាក់នៅស្រុកស្នួលត្រូវកម្លាំងនគរបាលខេត្ត ក្រចេះឃាត់ខ្លួនក្នុងប្រតិបត្តិការនាល្ងាចថ្ងៃទី១២ ខែតុលា នេះ ស្ថិតនៅស្ពានព្រែកឆ្លូង ស្រុកស្នួល ខេត្តក្រចេះ។
អ្នកឆ្លើយឆ្លងព័ត៌មាន មេគង្គប៉ុស្តិ៍ បានឲ្យដឹងថា ក្រោយពេលកើតហេតុភ្លាមសមត្ថកិច្ចបានកំណត់មុខសញ្ញាជនសង្ស័យរួចបានចេញស្វែងរកចាប់ខ្លួនតែម្តងក្នុងនោះមានឈ្មោះ រស់ និងឈ្មោះ ហៀង ព្រមទាំងបក្ខពួក ២នាក់ទៀត ហើយបាននាំយកជនសង្ស័យទាំង ៤នាក់ នោះទៅសាកសួរពាក់ព័ន្ធនឹងអំពើឃាតមនុស្សលើអ្នកកាសែតកាលពីរំលងអាធ្រាត្រ។
ប្រភពបន្តថា អ្នកកាសែតដែលឈ្មួញឈើបាញ់សម្លាប់កាលពីរំលងអាធ្រាត្រ ឈានចូល ថ្ងៃទី ១២ ខែតុលា ឆ្នាំ ២០១៤នោះមានឈ្មោះតាំង ទ្រី ភេទប្រុស អាយុ៤៩ឆ្នាំ កាន់កាតកាសែតសមាគមខ្មែរ អ្នកប្រជាធិប តេយ្យ និងជាអ្នកយកព័ត៌មានកាសែត«ថ្ងៃនេះ»។ ជនរងគ្រោះ ត្រូវបាញ់ចំក្បាលស្លាប់នៅក្បែររថយន្ត ។ ហេតុការណ៍នេះ បានកើតឡើងនៅ លើផ្លូវជាតិកាច់ទៅភូមិទួលពន្លៃ ឃុំឃ្សឹម ស្រុកស្នួល ខេត្តក្រចេះ។ បន្ទាប់ពីបាញ់ស្លាប់រួច ក្រុមជនល្មើសបានជិះឡានលុចស៊ីស៤៧០ ពណ៌ខ្មៅគេចខ្លួន តែបើករថយន្តបានប្រមាណ ៥០០ម៉ែត្រ ពីកន្លែងកើត ហេតុក៏ក្រឡាប់ ហើយជនល្មើសបាននាំគ្នារត់គេចខ្លួនបាត់បន្សល់ទុក រថយន្តដែលក្រឡាប់នោះចោល។
សេចក្តីរាយការណ៍បន្តឲ្យដឹងថា នៅមុនពេលកើតហេតុជនរងគ្រោះ និងមិត្តភក្តិរួមការងារបាន ជិះឡានទៅមើលក្រុមឈ្មួញធ្វើសកម្មភាពដឹកជញ្ជូនឈើ នៅចំណុចជួរក្រាំងឃុំខ្សឹម ស្រុកស្នួល។ នៅពេលទៅដល់ថៅកែឈើបានហៅ “ ចរចា ” ។
អ្នកកាសែតម្នាក់ដែលបានដឹងហេតុការណ៍នេះនិយាយថា មុនពេលកើតហេតុមានអ្នកកាសែតប្រមាណ ៥ ទៅ ៦នាក់ បានចុះទៅយកព័ត៌មានទាក់ទងនឹងរឿងឈើប្រណីតនេះ ប៉ុន្តែនៅពេលត្រឡប់មកវិញនៅម៉ោងប្រមាណ ១២អាធ្រាត្រ ថ្ងៃទី១១ ឈានចូលថ្ងៃទី១២ តុលា ស្រាប់តែរថយន្តរបស់លោក តាំង ទ្រី ជាប់ផុង ប៉ុន្តែពួកលោកមកមុនហួសទៅហើយ ក៏នាំគ្នាចូលសម្រាកអស់ទៅ ស្រាប់តែព្រឹកឡើងទើបដឹងថាលោក តាំង ទ្រី ត្រូវគេបាញ់ស្លាប់។
លោកយល់ថា ការស្លាប់នេះ គឺពាក់ព័ន្ធនឹងឈ្មួញឈើនោះហើយ ពីព្រោះនៅក្បែរកន្លែងកើតហេតុមានបន្សល់ទុករថយន្តម៉ាក ឡិចស៊ីស ៤៧០ (LUXES 470) ពណ៌ខ្មៅ ហើយកន្លងមកឈ្មួញឈើក៏ធ្លាប់បានគំរាមពួកលោកថែមទៀតផង៖ «កន្លងមកតែងតែមានដែរ ពាក់ព័ន្ធនឹងការគំរាមកំហែងប្រើពាក្យអសុរោះ ការប្រមាថជារៀងរហូត ប៉ុន្តែគ្រាន់តែមិនមានករណីដល់បាញ់សម្លាប់គឺមានតែការប្រមាថថា ប្រយ័ត្នធ្វើអ៊ីចេះ ប្រយ័ត្នធ្វើអ៊ីចុះ។អ្នកដែលធ្វើហ្នឹងមានតែឈ្មោះល្បីៗពីរបីនាក់ទេជើងខ្លាំង។ មានមួយទៀតឈ្មោះ ហៀង ធ្លាប់ជាប៉ូលិសនៅក្នុងទឹកដីស្រុកយើងនេះ ប៉ុន្តែមិនមែន ហ៊ាង អធិការស្រុកចិត្របូរីទេ គឺហៀង ផ្សេង ហើយមួយទៀតឈ្មោះ រស់ សុទ្ធតែជាអ្នកល្បីដែលចូលចិត្តប្រើកាំភ្លើងបាញ់បោះសេរី។
គួររំលឹកថា កន្លងមកនៅខេត្តក្រចេះត្រូវគេមើលឃើញថា ជាទឹកដីដែលប្រមូលផ្តុំដោយឈ្មួញរកស៊ីឈើសំខាន់ៗ និងមានឥទ្ធិពល ប៉ុន្តែមិនដែលឃើញអាជ្ញាធរដែនដីឬសមត្ថកិច្ចជំនាញបង្ក្រាបយកទៅ ផ្តន្ទាទោសម្តងណាឡើយ បើទោះបីជាប្រមុខរាជរដ្ឋាភិបាលធ្លាប់បានព្រមានជាញឹកញាប់បែបណាក៏ដោយ។ កត្តាដែលមិនអើពើចំពោះបទល្មើសព្រៃឈើរបស់អាជ្ញាធរខេត្តគឺជាការលើកទឹកចិត្តដល់ក្រុម ឈ្មួញទុច្ចរិត ហើយញ៉ាំងឲ្យពួកទាំងនោះរីកថ្លើមហ៊ានធ្វើឃាតអ្នក កាសែតទៀតផង។ស្រដៀងគ្នានេះដែរ នៅខេត្តក្រចេះត្រូវគេដឹងថាជាខេត្តដែលអ្នកកាសែតត្រូវគេឃាត់ខ្លួន ឃុំខ្លួន និងប្រមាថគំរាមសម្លាប់ពីក្រុមឈ្មួញឈើច្រើនជាងគេក្នុងចំណោមខេត្តផ្សេងទៀត៕ ជំនិត
