ដោយ ៖ រតនា
ភ្នំពេញ៖ តារាសម្តែង តារាកំប្លែង ពិធីករជិត១០នាក់បានចេញលក់ស្ករគ្រាប់នៅតាមហាងផឹកស៊ីមួយចំនួននៅភ្នំពេញដើម្បីស្វែងរកថវិកាខ្លះជួយឧបត្ថម្ភដល់សិល្បករដែលមានបញ្ហាខ្វះខាតជីវភាព និងមានជំងឺប្រចាំកាយ ។
សិល្បកររួមមាន លោកឧកញ៉ា ទុំ សារ៉ុត ហៅនាយឃ្លោក អ្នកនាង ស៊ុន ណារីម៉ូនីកា លោក ម៉ាដូណា លោក អ៊ឹម ជីវ៉ា និងវីជេ អាឡាស្កូ បានចាប់ផ្តើមចេញលក់ជាលើកដំបូងកាលពីរាត្រីថ្ងៃទី៣ ខែកុម្ភៈនេះ ហើយពួកគេនឹងបន្តការងារសប្បុរសធម៌នេះចាប់ពីថ្ងៃទី០៥ ខែកុម្ភៈ បន្តទៀត។
តាមការគ្រោងទុក ថវិកាទាំងអស់ដែលបានមកពីការដើរលក់ស្ករគ្រាប់ ឬពីសប្បុរសជននានានឹងប្រគល់ជូនសិល្បករមានវ័យចំណាស់ ជរាពាធ ឬមានបញ្ហាជីវភាព ដែលនឹងរៀបចំធ្វើនៅថ្ងៃ”ទិវានៃក្តីស្រលាញ់១៤កុម្ភៈ”ខាងមុខនេះ។
បើទោះបីជាថវិកាដែលទទួលបានពីសប្បុរសជនមានចំនួនតិចតួចយ៉ាងណាក្តី ប៉ុន្តែវាកើតឡើងពីក្តីស្រលាញ់របស់សប្បុរសជន និងសិល្បិករដូចគ្នាដែលឆ្លៀតឱកាសពីការងារសិល្បៈ ដើម្បីស្វែងរកថវិកាជួយពួកគាត់។ នេះបើតាមការបញ្ជាក់របស់លោកអ៊ឹម ជីវ៉ា។
ពិធីករលោក អ៊ឹម ជីវ៉ា បានបញ្ជាក់ថា លោក និងសិល្បករមួយចំនួនបានដើរលក់ស្ករគ្រាប់ តាមហាងនៅក្នុងរាជធានីភ្នំពេញ ស្ថិតក្រោមប្រធានបទ” ស្ករគ្រាប់សិល្ប:” ដើម្បីយកថវិកាដែលបានពីការលក់ស្ករគ្រាប់នោះ មកជួយសិល្បករចាស់ៗ ដែលកំពុងមានជំងឺបាត់បង់សមត្ថភាព ក្នុងកាសម្តែង ជីវភាពក្រីក្រខ្វះខាត។ ពិធីកររូបនេះបញ្ជាក់ថា ការដើរលក់នេះមិនមែនត្រឹមតែជាការលក់រកលុយតែមួយមុខទេ តែបង្ហាញពីក្តីស្រលាញ់ចំពោះអ្នករួមអាជីពដូចគ្នា ហើយក៏ជាឱកាសឆ្លៀតផ្សព្វផ្សាយពីការលើកស្ទួយវិស័យសិល្បៈទៅដល់មហាជនផងដែរ។
លោកបញ្ជាក់ថា ដោយមើលឃើញពីភាពលំបាក របស់សិល្បករចាស់ៗមួយចំនួន កំពុងត្រូវការថវិកា ជាចាំបាច់ក្នុងជីវភាពប្រចាំថ្ងៃ លោករួមនិងសិល្បករមួយចំនួនសម្រេចចិត្តចំណាយពេលខ្លះពីការងារសិល្បៈដើម្បីដើរលក់ស្ករគ្រាប់តាមហាង ដើម្បីប្រមូលថវិកាដែលបានមកទាំងអស់ យកទៅជួយដល់ពួកគាត់ ដែលជួបការលំបាក នៅក្នុងជីវភាពប្រចាំថ្ងៃ ។ លោកបញ្ជាក់ដែរថាការដើរលក់ស្ករគ្រាប់មានតែ៥ថ្ងៃតែប៉ុណ្ណោះ គឺស្ករមួយដើមតម្លៃ១ដុល្លារ ហើយសម្រាប់ថ្ងៃដំបូងគឺសិល្បករអាចរកបានប្រាក់ចំនួន៥០ដុល្លារអាមេរិក។
លោកបញ្ជាក់ថា ដោយសារជាថ្ងៃដែលសិល្បករមមាញឹកទើបមិនបានចូលលក់ច្រើនហាង ប៉ុន្តែសិល្បករមួយចំនួនទៀតក៏ស្ម័គ្រចិត្តលក់បន្តនៅថ្ងៃទី៥មករាទៀតនៅតាមហាងមួយចំនួនដែលលោកនិងសិល្បកររំពឹងថា នឹងទទួលបានថវិកាមួយចំនួនជួយដល់សិល្បករដែលមានបញ្ហា។
លោកបញ្ជាក់ថា នឹងមានសិល្បករផ្សេងទៀតចូលរួមមានដូចជាអ្នកនាង ចាន់តារាទី កញ្ញា ឌួង ម៉ានិចជាដើមក៏នឹងចូលរួមក្នុងថ្ងៃបន្ទាប់ទៀតផងដែរ៕
