ដោយ ៖ អ វឹង
ខេត្តកំពត៖ព្រឹកថ្ងៃអាទិត្យទី ១៤ ខែកុម្ភៈ ឆ្នាំ ២០១៦ លោក ជួន សុភា អភិបាលរងស្រុកកំពង់ត្រាច និងព្រះតេជគុណព្រះចៅអធិការវត្តប្រជាសង្គមភ្នំក្រពើ ព្រះតេជគុណវត្តអង្គកកោះ រួមជាមួយក្រុមការងារសហភាពសហព័ន្ធយុវជនកម្ពុជាស្រុកកំពង់ត្រាច លោកមេឃុំ មេភូមិ បានធ្វើពិធីប្រគល់អណ្តូងទឹកស្អាតមួយកន្លែងជាអំណោយរបស់លោកអ៊ុម ស៊ីណាត អភិបាលនៃគណៈអភិបាលស្រុកតាមរយៈសហភាពសហព័ន្ធយុវជនកម្ពុជាស្រុក ជូនប្រជាពលរដ្ឋចំនួន ១៦គ្រួសារដែលនៅឆ្ងាយពីប្រភពទឹក សម្រាប់ប្រើប្រាស់រួមគ្នាក្នុងភូមិកោះម៉ាក់ប្រាំង ឃុំបឹងសាលាខាងជើង ។ក្នុងពិធីនេះមានប្រជាពលរដ្ឋចូលរួមសរុប ៤០នាក់ និងកុមារាកុមារីចូលរួមសរុប ៧៩ នាក់ ផងដែរ ។
លោក ជួន សុភា អភិបាលរងស្រុកកំពង់ត្រាចមានប្រសាសន៍ថា ក្នុងការចុះចែកអណ្តូងទឹកស្អាត ជូនប្រជាពលរដ្ធតត្រូវចំណាយថវិការអស់ចំនួនមួយលានរៀល។
លោកអភិបាលរងស្រុកបន្តថា នាព្រឹកនេះដែរ ជាថ្ងៃ១៤កុម្ភៈ ដែលថ្ងៃនៃសេចក្តីស្រឡាញ់ ខ្ញុំនិងក្រុមការងារបានអោយថ្ងៃនៃសេចក្តីស្រឡាញ់នេះជាថ្ងៃ”សប្បុរសធម៌នៃក្តីស្រឡាញ់” ចំពោះបងប្អូនប្រជាពលរដ្ឋក្នុងឃុំ និងសម្រាប់ កុមារា កុមារី ក្នុងភូមិដែលបានចូលរួមក្នុងកម្មវិធីនេះ ដោយបាននាំយកអំណោយលោកអភិបាលស្រុកមកជូនបងប្អូននិងកុមារ មានអាវមួយសម្រាប់ និងថវិកា១០០០រៀលសម្រាប់កុមារដែលចូលរួម ។
សេចក្តីស្រឡាញ់ កើតចេញពីអំពើល្អ អំពើល្អកើតចេញពីក្នុងចិត្ត ។ សូមអោយសេចក្តីស្រឡាញ់នេះស្ថិតក្នុងបេះដូងរបស់បងប្អូនជារៀងរហូត ៕
