ដោយ៖សហការី
សៀមរាប៖ នៅរសៀលថ្ងៃទី១៤ ខែកុម្ភៈ ឆ្នាំ២០១៦នេះ សមត្ថកិច្ចខេត្តសៀមរាប បាននាំឃាតករ២នាក់ ដែលបានសម្លាប់ កាត់ក្បាលនារីរងគ្រោះក្នុងផ្ទះសំណាក់ ហើយយកទៅដុតចោលនោះ ទៅកាន់ផ្ទះសំណាក់ដែលជាកន្លែងកើតហេតុ ដើម្បីឲ្យពួកគេទាំង២នាក់ ធ្វើត្រាប់ឡើងវិញ នូវសកម្មភាពដែលពួកគេបានប្រព្រឹត្តិលើនារីរងគ្រោះ។
ការនាំខ្លួនឃាតករទាំង២នាក់ ទៅកាន់ផ្ទះសំណាក់ដែលជាកន្លែងកើតហេតុនេះ បន្ទាប់ពីសមត្ថកិច្ចបញ្ចប់ការសាកសួររួចរាល់នៅរសៀលថ្ងៃទី១៤ ខែកុម្ភៈនេះ។
សូមជំរាបថា លោក ឃឹម ប៊ុនសុង អភិបាលខេត្តសៀមរាប បានថ្លែងតាមទូរស័ព្ទប្រាប់អ្នកយកព័ត៌មានថា ឃាតកម្មដែលកាត់ក្បាលនារីនៅផ្ទះសំណាក់ ក្រុងសៀមរាប គឺផ្តើមចេញពីរឿងបុរសជាឃាតកចូលស្តីដណ្តឹងនារីនោះមិនបាន ហើយខឹងក៏ណាត់ទៅជួបគ្នានៅផ្ទះសំណាក់ហើយសម្លាប់កាត់ក្បាលតែម្តង។
លោកអភិបាលខេត្តបានបញ្ជាក់ទៀតថា៖ ឃាតកមានគ្នា២នាក់។ បុរសដែលជាឃាតក (ជនកាត់ក្បាល) នោះមានប្រពន្ធ និងកូន៣-៤នាក់ហើយ។ ជននេះបានព្យាយាមចូលស្តីដណ្តឹងនារីរងគ្រោះ ប៉ុន្តែមិនបាន។ លោកអភិបាលបានបញ្ជាក់បន្ថែមថា សមត្ថកិច្ចចាប់បាន ខណ:ឃាតកកំពុងដុតក្បាលជនរងគ្រោះនៅខាងក្រោយផ្ទះ ស្ថិតនៅភូមិព្រៃចាស់ សង្កាត់គោកចក ក្រុងសៀមរាប ពោលជិតព្រលានយន្តហោះ។
សមត្ថកិច្ចបានឲ្យដឹងថា មូលហេតុដែលនាំឲ្យជនដៃដល់សម្លាប់ជនរងគ្រោះនោះ ផ្តើមចេញពីរឿងស្នេហា។ ជនសង្ស័យមានប្រពន្ធរួចហើយ តែក្រោយមក មានបញ្ហាជាមួយប្រពន្ធដើម រហូតសុំលែងលះ តែលែងលះមិនទាន់ដាច់ស្រេចទេ។ បន្ទាប់មកឃាតកក៏មានទំនាក់ទំនងជាមួយនារីរងគ្រោះ រហូតចូលស្តីដណ្តឹងនាង ហើយឈានទៅដល់ការរៀបចំពិធីមង្គលការ ប៉ុន្តែដំណើរការរៀបចំពិធីអាពាហ៍ពិពាហ៍ទៅមិនរួចដោយហេតុថា ជនសង្ស័យមិនទាន់លែងប្រពន្ធដាច់ស្រេចតាមផ្លូវច្បាប់។
ក្រោយមានបញ្ហានេះ នារីរងគ្រោះបានចាត់ទុកថា ជនសង្ស័យបានបោកប្រាស់ខ្លួនរហូតឈ្លោះប្រកែកគ្នាយ៉ាងខ្លាំង ហើយជនសង្ស័យក៏រៀបចំផែនការសម្លាប់នារីរងគ្រោះដោយល្បួងនាងទៅជួបនៅផ្ទះសំណាក់ រួចសម្លាប់ដោយកាត់ក្បាលតែម្តង។ ឃាតកម្នាក់មានឈ្មោះ ចាន់ ឆាយយ៉ា ហៅ សំ ភារ៉ាត់ អាយុ៤០ឆ្នាំ ស្រុកកំណើត នៅខេត្តបាត់ដំបង ចំណែកម្នាក់ទៀតមិនទាន់ស្គាល់អត្តសញ្ញាណទេ៕
