ដោយ៖សហការី
ខេត្តកំពត៖ក្រុមឈ្មួញរកស៊ីដឹកទំនិញមកពីប្រទេសវៀតណាមបានត្អូញត្អែរថា ពួកគាត់ដឹកទំនិញចេញឬចូលទៅប្រទេសវៀតណាមត្រូវបង់លុយឱ្យកូនចៅលោក ទូច សារី ក្នុងមួយឡានៗមិនក្រោមពីបីម៉ឺនទៅបួនម៉ឺនរៀលទេ បើមិនបង់លុយឱ្យនោះលោក ទូច សារី និងបញ្ជាឱ្យកូនចៅរបស់លោកចាប់បង់លុយទ្វេដង ខ្លាំងជាងប៉ូលីសសេដ្ឋកិច្ចទៅទៀត។
ការរិះគន់ និងទម្លាយព័ត៌មានដល់អ្នកកាសែតនេះ បានលេចឮឡើងនៅក្រោយពេលដែលក្រុមអាជីវករ និងអ្នករកស៊ីនាំទំនិញចេញ ចូលប្រទេសវៀតណាមបាន គឺដោយសារពួកគេមិនសប្បាយចិត្តនឹងមន្ត្រីខ្លះជាកូនចៅរបស់លោក ទូច សារី ដែលគេអះអាងថាបានគាបសង្កត់ទារលុយពីពួកគេតាមអំពើចិត្ត ផ្ទុយពីភារកិច្ចរបស់ខ្លួនដែលជាអ្នកការពារព្រំដែន ប៉ុន្តែខ្លាំងជាងមន្ត្រីជំនាញគយ ឬប៉ូលីសសេដ្ឋកិច្ចទៅទៀត។
កន្លងមកនេះកម្លាំងរបស់លោក ទូចសារី ត្រូវគេមើលឃើញថា ពង្រាយកម្លាំងឱ្យដើរយកលុយពីក្រុមឈ្មួញមិនថាយប់ ឬថ្ងៃទេឱ្យតែមានបទល្មើសត្រូវតែយកលុយមិនលើកលែងនោះទេ ពិសេសនៅជុំវិញតំបន់ច្រកទ្វារអន្តរជាតិព្រែកចាក។
គួររំឭកថា ក្នុងមួយយប់ៗមានរថយន្តដឹកទំនិញជាច្រើនគ្រឿងចេញចូលទៅមកប្រទេសវៀតណាម កម្ពុជាដែលក្រុមឈ្មួញលើកឡើងថា ត្រូវបង់លុយឱ្យក្រុមលោក ទូច សារី ទើបពេលថ្មីៗនេះ មេគង្គប៉ុស្តិ៍ បានភ្ជាប់ទូរសព្វ័ទៅរកលោក ទូច សារី ដើម្បីសុំការបំភ្លឹផ្ទៀងផ្ទាត់ព័ត៌មានពាក់ព័ន្ធនឹងការរិះគន់នេះដែរ តែទូរស័ព្ទរបស់លោកមិនអាចទំនាក់ទំនងបាន៕
