ភ្នំពេញ៖ អធីករនៅវត្តស្ទឹងមានជ័យបង្កឲ្យព្រះសង្ឃវាយតប់គ្នា បណ្តាលឱ្យរងរបួសទាំងសងខាង កាលពីវេលាម៉ោង ៨ យប់ថ្ងៃទី ២៣ ខែតុលា នៅក្នុងបរិវេណចង្ក្រានតាព្រហ្ម ហៅវត្តស្ទឹងមានជ័យ មានទីតាំងតាមបណ្ដោយផ្លូវមុនីរ៉េត សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
សេចក្តីរាយការណ៍ពីកន្លែងកើតហេតុបានឲ្យដឹងថា កាលពីយប់ថ្ងៃទី២៣ ខែតុលា ព្រះសង្ឃព្រះនាម សឺន ហាយ បានត្រឡប់មកពីចូលរួមដង្ហែក្បួនបាតុកម្មថ្ងៃរំលឹកកិច្ចព្រមព្រៀងទីក្រុងប៉ារីស២៣តុលា ក្នុងទីក្រុងភ្នំពេញមកនោះ បានយកម៉ូតូរបស់និស្សិតក្នុងវត្តរៀនជិះនៅក្នុងបរិវេណវត្តខុស ទៅនឹងវិន័យសង្ឃ។ ខណៈដែលព្រះសង្ឃ សឺន ហាយ កំពុងតែរៀនបើកបរម៉ូតូក្នុងបរិវេណវត្តនោះ អ្នករត់ម៉ូតូកង់បីម្នាក់ឈ្មោះ ធូ ធីម ភេទប្រុស អាយុ៤១ឆ្នាំ ដែលតែងតែអង្គុយចាំម៉ូយនៅក្នុងវត្តស្ទឹងមានជ័យបានស្រែកឃាត់ទៅព្រះសង្ឃសឺន ហាយ កុំឲ្យរៀនជិះម៉ូតូក្នុងនាមជាសង្ឃគ្រងស្បង់នាំឲ្យខុសទៅវិន័យសង្ឃ បើចង់រៀនជិះចាំលាសិក្ខាបទសិន។
ប្រភពបន្តថា បន្ទាប់ពីរឿងហេតុនេះកើតឡើងព្រះចៅអធិការវត្តស្ទឹងមានជ័យក៏បាននិមន្តព្រះសង្ឃ សឺន ហាយ ឲ្យឡើងទៅព្រះវិហារដើម្បីទូលថ្វាយនូវកំហុសឆ្គងក្នុងវិន័យសង្ឃ។ ប៉ុន្តែនៅវេលាម៉ោង១៤រសៀលថ្ងៃទី២៤ ខែតុលា ក៏ស្រាប់តែមានព្រះសង្ឃនិមន្តមកពីវត្តសាមគ្គីរង្សី និង មានវត្តមានព្រះសង្ឃព្រះនាម សឺន ហាយ និមន្តមកជាមួយបានមកស្រែកឡូឡារកមុខឈ្មោះ ធូ ធីម ដែលជាអ្នករត់ម៉ូតូឌុបឲ្យមកជួបដើម្បីដោះស្រាយ។ ពេលជួបគ្នានោះពុំបាននិយាយសម្របសម្រួលរកហេតុផលសមរម្យឡើយគឺបង្កជម្លោះរហូតដល់ស្ទុះមកវាយអ្នករត់ម៉ូតូឌុបធ្វើឲ្យស្ថានភាពកាន់តែធ្ងន់ធ្ងរឡើងៗ។ ក្នុងនោះគេបានឃើញអ្នករត់ម៉ូតូឌុបដែលមានមាឌធំបានការពារខ្លួន ពេលឃើញព្រះសង្ឃព្រះនាម សឺន ហាយ ស្ទុះមករកវាយ រួចក៏ចាប់លើកបីគ្រវីគ្រវាត់មិនដឹងជាប៉ះនឹងដំបងជនណាមួយទើបបណ្តាលឲ្យព្រះសង្ឃសឺន ហាយ បានរងរបួសព្រោះមុនស្សម្នាច្រើនកុះករ។
ប្រភពបន្តថា ការប៉ះទង្គិចគ្នានេះ ត្រូវកម្លាំងសមត្ថកិច្ចនគរបាលខណ្ឌមានជ័យបានចុះទៅអន្តរាគមន៍ ទប់ស្កាត់កុំឲ្យមានអំពើហិង្សាកើតឡើងធ្ងន់ធ្ងរដោយបានបញ្ចៀសឲ្យភាគីទំនាស់ដាក់ពាក្យប្តឹង នៅទីស្នាក់ការនគរបាលប៉ុស្ដិ៍ស្ទឹងមានជ័យ ទៅតាមដំណើររឿងដើម្បីបន្ធូរកំហឹងទាំងសងខា៕
សង្ឃរងគ្រោះ 
