ភ្នំពេញ៖ ស្ពានជ្រោយចង្វាទី២ នឹងត្រូវដំណើរ ការឲ្យប្រជាពលរដ្ឋឆ្លងកាត់ជាបណ្តោះអាសន្ននៅថ្ងៃទី០១ ខែវិច្ឆិកា ឆ្នាំដើម្បីចូលរួមអបអរ សាទរព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់ប្រាប់ឱ្យដឹងនៅថ្ងៃទី២៨ ខែតុលានេះថា នៅថ្ងៃទី១ ខែវិច្ឆិកា ឆ្នាំ២០១៤ខាងមុខនេះ ប្រជាពលរដ្ឋនឹងបានធ្វើដំណើរឆ្លងកាត់ ស្ពានជ្រោយចង្វាទី២នេះ ក្នុងឱកាសប្រទេសកម្ពុជាបានប្រារព្ធពិធីបុណ្យអុំទូកឡើងវិញ ប៉ុន្តែអាជ្ញាធរនៅមិនទាន់កំណត់យកថ្ងៃកាត់ខ្សែបូរសម្ពោធជាផ្លូវការនៅឡើយ។
គួរបញ្ជាក់ថា ស្ពានជ្រោយចង្វាទី២ ដែលជាស្ពានភ្លោះបន្ទាប់ពីស្ពានច្បារអំពៅនោះ មានទទឹងប្រវែង ១៣,៥ម៉ែត្រ បណ្តោយប្រវែង១២៦០ម៉ែត្រ បានបើកដំណើរការសាងសង់ចាប់តាំងពីខែវិច្ឆិកា ឆ្នាំ២០១១ ក្រោមអធិបតីភាពលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយបើតាមមន្ត្រីជំនាញ ស្ពាននេះនឹងសម្ពោធដាក់ឲ្យដំណើរការប្រើប្រាស់ជាផ្លូវការនៅខែធ្នូ ឆ្នាំ២០១៤។
ស្ពានជ្រោយចង្វាទី២នេះ ថវិកាដែលត្រូវចំណាយសាងសង់អស់ ២៧,៥លានដុល្លារអាមេរិក ឥណទាន ហិរញ្ញប្បទាន ពីប្រទេសចិន ហើយការសាងសង់ស្ពាននេះ មានទាំងអ្នកបច្ចេកទេសចិន និងកម្ពុជា រួមគ្នាដោយអ្នកបច្ចេកទេសចិន បានផ្ទេរបច្ចេកវិជ្ជា ឱ្យវិស្វករកម្ពុជា មានបទពិសោធន៍ ក្នុងការសាងសង់ សម្រាប់អនាគតផងដែរ៕
