ដោយ៖ រតនៈ
ភ្នំពេញ៖តារាសម្តែងទើបនឹងលេចមុខក្នុងវិស័យសិល្បៈគឺកញ្ញា ដេននី ក្វាន់ បានរងការរិះគន់មិនសំចៃមាត់ពីអ្នកលេងបណ្តាញទំនាក់ទំនងសង្គមហ្វេសប៊ុក ក្រោយពីរូបថតជាច្រើនសន្លឹករបស់នាងក្នុងឈុតហែលទឹកនៅមាត់សមុទ្រ។ ទោះជាយ៉ាងណាតារាស្រីទើបល្បីឈ្មោះរូបនេះបានលើកឡើងថា មិនខ្វល់នឹងការរិះគន់កន្លងទៅទេ ហើយនាងនឹងបន្តភាពសិចស៊ីកាន់តែខ្លាំងជាងនេះប្រសិនបើអ្នកផលិតតម្រូវឲ្យនាងធ្វើដូចនេះ។
រូបថតបង្ហាញដងខ្លួនដ៏ស្រលនជាច្រើនសន្លឹក ជាមួយនឹងឈុតប៊ីគីនីបិទបាំងតែកេរ្តិ៍ភេទលើក្រោមបន្តិចគ្រាដែលនាងចេញទៅសម្តែងនៅលើកោះទន្សាយ ធ្វើឲ្យបុរសៗជាច្រើន មើលភ្លឹកជាមួយនឹងការសរសើរពីរូបរាងនាង។ទន្ទឹមនឹងការសរសើរពីរូបរាងស្រឡនស្អាតនេះ ក៏មានក្រុមអ្នករិះគន់ជាច្រើនបានវាយប្រហារដោយពាក្យសម្តីធ្ងន់ថានាងជាអ្នកបំផ្លាញសិល្បៈ និងប្រពៃណីជាតិខ្មែរ ហើយនាងធ្វើខ្លួនលើសពីអ្នកសិល្បៈ។
ប្រឆាំងតបនឹងទស្សនៈនេះ ស្រីស្រស់ ដេននី ដែលមានឈ្មោះពិត ឆោម ខ្វាន់ បញ្ជាក់ថា នាងមិនខ្វល់នឹងពាក្យរិះគន់ទាំងប៉ុន្មាននោះទេ។ មិនខ្វល់ព្រោះនាងយល់ថា មិនអាចផ្គាប់ចិត្តមនុស្សគ្រប់គ្នាបានឡើយហើយរូបថតទាំងនោះស្ថិតក្នុងលក្ខណៈសិល្បៈជាឈុតដែលនាងស្លៀកសម្រាប់ងូតទឹកសមុទ្រ មិនមែនជាឈុតដែលនាងស្លៀកហើយដើរចូលក្នុងផ្សារឡើយ។ ដេននី ខ្វាន់ បានឌឺដងថា ឬចង់ឲ្យនាងស្លៀកក្បិនហូលផាមួងទៅងូតទឹកសមុទ្រ អ្នករិះគន់ប្រហែលជាមិនធ្លាប់ទៅសមុទ្រទេមើលទៅ។ ក្រៅពីរិះគន់បែបចំអន់តារាស្រីទើបនឹងលេចមុខក្នុងរូបភាពជាអ្នកសិល្បៈបែបសិចស៊ីរូបនេះលើកឡើងថា នាងនឹងអាចសម្តែង ឬស្លៀកពាក់សិចស៊ីជាងនេះទៀតប្រសិនបើតម្រូវឲ្យមានការថតបែបនេះ។
ទោះជាយ៉ាងណាក្តី គេសង្កេតឃើញថា ការបង្ហាញភាពសិចស៊ីរបស់តារាសម្តែង ដេនី ខ្វាន់ បានបង្កើនកម្តៅការរិះគន់កាន់តែខ្លាំងពីសំណាក់មហាជន ពិសេសក្រោយពីនាងចេញមុខក្នុងវីដេអូឃ្លីបវាយបកយ៉ាងចាស់ដៃទៅលើអ្នកពេបជ្រាយនាងរួចមក៕
