ស្ថាប័ន​ពាក់ព័ន្ធ​អំពាវនាវ​សុំ​ឲ្យ​ព​ន្លឿ​ន​ច្បាប់​ស្តីពី​ការគ្រប់គ្រង​គ្រឿង​ស្រវឹង​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 24 March, 2016 ក+ ក-

រាជធានី​ភ្នំពេញ​៖​ក្រសួង​ព័ត៌មាន និង​អង្គការ​សង្គម​ស៊ីវិល​រួមទាំង​អ្នកសារព័ត៌មាន​ជាច្រើន​ស្ថាប័ន នៅ​ថ្ងៃទី​២៤ ខែមីនា ឆ្នាំ​២០១៦​នេះ បានរៀបចំ​វេទិកា​ពិភាក្សា ដើម្បី​ស្វែងរក​ការគាំទ្រ ស្តីពី​ផលប៉ះពាល់​នៃ​គ្រឿង​ស្រវឹង ហើយ​អ្វីដែល​ទទួលបាន​ពី​វេទិកា​នោះ គឺ​គ្រប់គ្នា​សុទ្ធតែ​គាំទ្រ​ឲ្យ​មានការ​អំពាវនាវ​ដល់​ស្ថាប័ន​សាមី ព​ន្លឿ​ន​ច្បាប់​ស្តីពី​ការគ្រប់គ្រង​គ្រឿង​ស្រវឹង​។​

លោក ជា ច័ន្ទ​បរិបូរណ៍ រដ្ឋលេខាធិការ​ក្រសួង​ព័ត៌មាន បាន​ថ្លែងថា គ្រឿង​ស្រវឹង​គឺជា​គ្រោះថ្នាក់​លំដាប់​ទី​៥ ដែល​នាំ​ឲ្យ​មាន​មនុស្ស​ស្លាប់​ប្រមាណ​២.៥​លាន​នាក់ ក្នុង​មួយឆ្នាំ នៅ​ទូទាំង​ពិភពលោក ហើយ​ជំងឺ​ចម្លែកៗ ប្រមាណ​២០០​មុខ ត្រូវបាន​គេ​រកឃើញថា ផ្តើម​ពី​គ្រឿង​ស្រវឹង ។ លោក​បន្តថា នៅ​កម្ពុជា គេ​បាន​ពិនិត្យឃើញថា ជាង​ពាក់កណ្តាល​នៃ​ស្រទាប់​យុវវ័យ​កំពុង​សេព​គ្រឿង​ស្រវឹង ក្នុងនោះ​ក៏មាន​កុមារា កុមារី អាយុ​ពី​១៣​ដល់​១៧​ឆ្នាំ ប្រមាណ​១០% ក៏បាន​ប្រើប្រាស់​គ្រឿង​ស្រវឹង​ផងដែរ ។​

លោក ជា ច័ន្ទ​បរិបូរណ៍ ក៏បាន​អំពាវនាវ​ដល់​អង្គការ​ក្រៅ​រដ្ឋាភិបាល ពាក់ព័ន្ធ​ពិចារណា​ជួយ​ដល់​ប្រព័ន្ធ​ផ្សព្វផ្សាយ​ក៏​ដូច​ពិធីករ ពិធី​ការី​នី រួមមាន​ការលើកទឹកចិត្ត ការបង្កើត​កម្មវិធី ដើម្បី​ផ្សព្វផ្សាយ​ពី​ផលប៉ះពាល់ ដែល​ផ្តើម​ពី​គ្រឿង​ស្រវឹង ។ លោក​អះអាងថា ប្រព័ន្ធ​ផ្សព្វផ្សាយ​មាន​តួនាទី​សំខាន់​ណាស់​ក្នុងការ​ផ្សព្វផ្សាយ​អំពី​ផលប៉ះពាល់​ឬ​គ្រោះថ្នាក់ បណ្តាលមកពី​សេព​គ្រឿង​ស្រវឹង បើទោះបីជា​បច្ចុប្បន្ននេះ​យើង​នៅ​សង្កេតឃើញថា ប្រព័ន្ធ​ផ្សព្វផ្សាយ​មួយចំនួន​នៅតែ​បន្ត​ផ្សា​ព្វ​ផ្សាយ​ឬ​ឃោសនា​អំពី​គ្រឿង​ស្រវឹង​ក៏ដោយចុះ ។​

លោក​វេជ្ជបណ្ឌិត មុំ គង់ នាយក​ប្រតិបត្តិ អង្គការ​ចលនា​ដើម្បី​សុខភាព​កម្ពុជា បាន​លើកឡើងថា គ្រឿង​ស្រវឹង​កំពុង​វាយលុក​យ៉ាងខ្លាំង​ក្នុងសង្គម​កម្ពុជា សំខាន់​ក្នុង​ស្រទាប់​យុវវ័យ រួមទាំង​កុមារា​កុមារី​ផងដែរ ដែល​ពួកគេ​កំពុងស្ថិត​ក្នុង ភាពសប្បាយ​រីករាយ​ដោយសារ​សេព​គ្រឿង​ស្រវឹង ។ លោក​បាន​បញ្ជាក់ថា គ្រឿង​ស្រវឹង​ផ្តល់​ផលប៉ះពាល់​យ៉ាងខ្លាំង​ដល់​មនុស្ស រួមមាន ជំងឺ គ្រោះថ្នាក់​ចរាចរណ៍ អំពើហិង្សា និង​ការខាតបង់​ថវិកា ។ ដោយឡែក​ជំងឺ​ដែល​ប៉ះពាល់​ដោយ​គ្រឿង​ស្រវឹង​សុទ្ធសឹង​ជា​ជំងឺ​កាច​សាហាវ​ដូចជា ជំងឺ​ក្រិត​ថ្លើម ជំងឺ​បេះដូង ជំងឺ​សរសៃឈាម ជំងឺ​ដំបៅ​ក្រពះ ជំងឺមហារីក និង​ជំងឺ​ប្រព័ន្ធ​សរសៃប្រសាទ ។​

ផ្តើម​ពី​ផលប៉ះពាល់​នៃ​គ្រឿង​ស្រវឹង​ដែល​កំពុង​ស្ថិតក្នុង​ហានិភ័យ​ប្រកបដោយ​គ្រោះថ្នាក់​ធ្ងន់ធ្ងរ និង​ការខាតបង់​ថវិកា​យ៉ាងច្រើន​នោះ ស្ថាប័ន​ដែល​ចូលរួម​ពិភាក្សាបាន​រួមគ្នា​អំពាវនាវ​ឲ្យ​ស្ថាប័ន​សា​ម៉ី​ព​ន្លឿ​ន​ច្បាប់​ពី​ការគ្រប់គ្រង​គ្រឿង​ស្រវឹង ដើម្បី​ឲ្យ​ច្បាប់​នេះ​ចេញ​បាន​ឆាប់​និង​យកទៅ​អនុវត្តន៍ ហើយ​បើទោះបីជា​ការអនុវត្ត​ច្បាប់​មិនបាន​គ្រប់​ជ្រុងជ្រោយ ប៉ុន្តែ​ពួកគេ​ជឿថា បន្ទាប់ពី​មានច្បាប់​ការសេព​គ្រឿង​ស្រវឹង​នឹងត្រូវ​កាត់បន្ថយ៕

white wine(1)