បាល់ទាត់៖គេហទំព័រផ្លូវការរបស់ក្លិប Aston Villa បានចុះផ្សាយថា អ្នកចាត់ការ Remi Garde បានសម្រេចចិត្តលាលែងពីតំណែងដោយខ្លួនឯង បន្ទាប់ពីមានការព្រមព្រៀងគ្នាទៅវិញទៅមករវាងក្លិប និងរូបគាត់ផ្ទាល់។
អ្នកចាត់ការសញ្ជាតិបារាំង វ័យ៤៩ឆ្នាំរូបនេះបានផ្លាស់មកដឹកនាំក្លិប Aston Villa កាលពីខែវិច្ឆិកា ឆ្នាំ២០១៥ បានសម្រេចចិត្តលាលែងពីតំណែងជាគ្រូបង្វឹក បន្ទាប់ពីនៅតែមិនអាចជួយស្រោចស្រង់ក្លិប Aston Villa ឲ្យរួចផុតពីតំបន់ដែលត្រូវកាត់ចោលក្នុងតារាងចំណាត់ថ្នាក់ក្របខ័ណ្ឌ Premier League របស់អង់គ្លេស។
សេចក្ដីថ្លែងការណ៍ខាងលើបានឲ្យដឹងទៀតថា ក្លិប Aston Villa ក៏បានធ្វើការអរគុណដោយស្មោះចំពោះការខិតខំប្រឹងប្រែងនាពេលកន្លងមករបស់អ្នកចាត់ការ Remi Garde ក្នុងពេលវេលាដ៏ពិបាកមួយចាប់តាំងពីអ្នកចាត់ការរូបនេះផ្លាស់មកដឹកនាំក្លិប Aston Villa ហើយក្លិបក៏បានជូនពរឲ្យអ្នកចាត់ការ Remi Garde ទទួលបានជោគជ័យនៅពេលដែលដឹកនាំក្លិបផ្សេងទៀត។
គេហទំព័រផ្លូវការរបស់ក្លិប Aston Villa បានបញ្ចាក់ថា ក្រោយពីការចាកចេញចេញរបស់លោក Remi Garde ក្លិបបានដាក់លោក Eric Black ឲ្យដឹកនាំក្លិប Aston Villa ជាគ្រូបង្វឹកបណ្ដោះអាសន្ន ហើយក្នុងនោះផងដែរក្លិប Aston Villa ក៏កំពុងតែមានបេក្ខភាព៣រូបដែលអាចនឹងត្រូវតែងតាំងធ្វើជាអ្នកចាត់ការផ្លូវការរួមមាន អតីតគ្រូបង្វឹករបស់ក្លិបទូកក្ដោង Everton គឺលោក David Moyes អតីតគ្រូបង្វឹករបស់ក្លិបក្ងានព្រៃ Swansea City លោក Gary Monk និងអតីតគ្រូបង្វឹករបស់ក្លិបកញ្ជ្រោង Leicester City លោក Nigel Pearson៕
