បាត់ដំបង៖ប្រជាពលរដ្ឋក្នុងតំបន់ភ្នំដូនមាយ ឃុំស្ដៅ ស្រុករតនះមណ្ឌល ខេត្តបាត់ដំបង ចំនួន២៦គ្រួសារបានតវ៉ានិងស្នើរសុំអោយក្រុមហ៊ុន BATTAMBANG KT CEMENTរបស់ចិនជួយដោះស្រាយសំណងលើដីជុំវិញភ្នំដែលអាស្រ័យផល២០ឆ្នាំមកហើយ ខណះក្រុមហ៊ុនចូលឈូសឆាយរំលោភទាំងមិនមានការទូទាត់។
អ្នកស្រីយ៉េន យួម អាយុ៦៥ឆ្នាំរស់នៅតំបន់ភ្នំដូនមាយ ឃុំស្ដៅ ស្រុករតនះមណ្ឌលបានអោយដឹងនៅថ្ងៃទី១៥ ខែឧសភា ឆ្នាំ២០១៦នេះថា៖ លោកស្រីមានដីធ្វើចំការចំនួន១ហិកតាដែលបានដាំដុះតាំងពីឆ្នាំ១៩៩៦មក លោកស្រីដើរស៊ីឈ្នួលគេផងនិងធ្វើតិចតួចខ្លួនឯងផងគ្រាន់បានចិញ្ចឹមជីវិត ពេលនេះដីដាំដុះខាងលើត្រូវភាគីខាងក្រុមហ៊ុនរឹមអូសយកនិងកំពុងឈូសឆាយដោយមិនបានដោះស្រាយសំណងនៅឡើយបើទោះបីដីនេះជាដីចំណីភ្នំក៍ដោយ ព្រោះគាត់បានអាស្រ័យផលជាយូរមកហើយនិងមិនបានទទេ ទេគឺបានមកពីការសន្សំលុយទិញគេយ៉ាងលំបាកជាទីបំផុត មិនតែប៉ុណ្ណោះកាលពីដើមរដូវដាំដុះនេះលោកស្រីបានជួលអោយគេអោយធ្វើស្មៅនិងភ្ជួរអស់លុយដែលបេះពីមាត់ពីករមួយចំនួនថែមទៀត។
លោក ឡុក នី អាយុ៤៩ឆ្នាំបានអោយដឹងដែរថា៖ ដីអាស្រ័យផលរបស់លោកចំនួន២ហិកតាដែលមានទីតាំងនៅជំរាលចង្កេះភ្នំនិងផ្នែកខាងក្រោមជាប់ភ្នំត្រូវបានខាងក្រុមហ៊ុនហាមឃាត់មិនអោយចូលក្បែរដើម្បីដាំដុះឡើយ ពេលនេះគ្រឿងចក្រកំពុងឈូសឆាយនិងខួងយ៉ាងគគ្រឹកគគ្រេង មិនតែប៉ុណ្ណោះខាងក្រុមហ៊ុនបានអះអាងថាបានដោះស្រាយសំណងអោយរួចរាល់ហើយ ប៉ុន្ដែជាក់ស្ដែងលោកមិនទាន់ទទួលបានលុយសំណងឡើយប្រហែលជាមានអាថ៌កំបាំងនៅក្នុងរឿងនេះ។
លោកស្រីធាន ស៊ុង អាយុ៦៤ឆ្នាំបានលើកឡើងផងដែរថា៖ ផ្ទៃដីដាំដុះរបស់លោកស្រីចំនួន១០ហិកតា គ្រប់គ្រងនិងបានបង្ករនង្កើនផលពោត សណ្ដែក ដំឡុងតាំងពីឆ្នាំ១៩៩៦មក ឥឡូវក្រុមហ៊ុនបានបោះបង្គោលហាមឃាត់មិនគាត់ចូលដាំដុះឡើយដោយក្រុមការងាររបស់ស្រុកបានអះអាងថាជាដីរបស់រដ្ឋព្រមទាំងបាននិយាយបំភិតបំភ័យជាច្រើនទៀតដាក់សម្ពាធទៅលើប្រជាពលរដ្ឋអ្នកល្ងិតល្ងង់។ លោកស្រីស្នើរសុំអោយអាជ្ញាធរខេត្តជួយពិនិត្យអោយបានដិតដល់និងជួយអោយមានការដោះស្រាយសំណងដល់ពួកគាត់ផងពីព្រោះប្រជាពលរដ្ឋក្រៅពីធ្វើចំការមិនមានអ្វីទីពឹងឡើយ ក្រីក្រណាស់។
ចំណែកលោកសៀវ ប៊ុនសៀន អភិបាលរងស្រុករតនះមណ្ឌលនិងជាក្រុមការងារដោះស្រាយរបស់ក្រុមហ៊ុនBATTAMBANG KT CEMENT Co.,ltdបានបញ្ជាក់ថា៖ ប្រជាពលរដ្ឋដែលនៅក្នុងរង្វង់ការប៉ះពាល់សរុបចំនួន១១៧គ្រួសារ រហូតមកទល់ពេលនេះបានដោះស្រាយទូរទាត់សំណងរួចរាល់បានចំនួន១១៣គ្រួសារហើយ នៅសល់តែ៤គ្រួសារទៀតប៉ុណ្ណោះនៅមិនទាន់ឯកភាពគ្នាដោយខ្លះទាក់ទងទៅនិងភាពមិនទាន់ត្រូវគ្នាលើតម្លៃដីចំការនិងខ្លះទៀតមិនត្រូវគ្នាដោយសារតម្លៃដើមឈើឬដំណាំផ្សេងៗ។
តំណាងក្រុមហ៊ុនលោកសៀង ប៊ុនធឿន បានលើកឡើងថា៖ ប្រជាពលរដ្ឋមានបញ្ហាជួបការលំបាកជាមួយក្រុមហ៊ុនសូមធ្វើសំណើរឡើងដើម្បីអោយក្រុមហ៊ុនដឹងពីថាប្រជាពលរដ្ឋជួបបញ្ហាអ្វី៕ប៉ែនសុផល
