រាជធានីភ្នំពេញ៖យោងតាមលិខិត ដែលចុះហត្ថលេខាដោយ លោក កឹម សុខា ប្រធានស្តីទី CNRP បានឲ្យដឹងថា គណបក្សសង្គ្រោះជាតិ សម្រេចបញ្ចប់សមាជិកភាពលោក យ៉ង ណុយ ខណដែលឈ្មោះក្នុង Facebook ដាក់ថា Brady Young នៅទីក្រុងឡុងប៊ិច ខណៈដែលការសម្រេចនេះ បានធ្វើឡើង បន្ទាប់ពីឈ្មោះ Brady Young ប្រធានក្រុមគាំទ្រ CNRP បានចោទប្រកាន់លោក ហ៊ុន ម៉ាណែត កូនប្រុសច្បងសម្តេច ហ៊ុន សែន ថា ជាកូនមេដឹកនាំវៀតណាម ដែលធ្វើឲ្យមជ្ឈដ្ឋានទូទៅភ្ញាក់ផ្អើលយ៉ាងខ្លាំង ។
ទោះបីជា លិខិតបដិសេធរបស់លោក កឹម សុខា ដែលអ្នកសារព័ត៌មានទទួលបានមិនទាន់មានការបញ្ជាក់ពីថ្នាក់ដឹកនាំឬមន្ត្រីជាន់ខ្ពស់ CNRP ក៏ដោយ ប៉ុន្តែប្រភពជាច្រើនអះអាងថា លិខិតខាងលើនេះ គឺត្រឹមត្រូវនិងផ្លូវការហើយ ។
សម្តេច ហ៊ុន សែន ធ្លាប់បាន ប្រតិកម្មចំពោះអ្នកចោទប្រកាន់ថា លោក ហ៊ុន ម៉ាណែត ជាកូនវៀតណាម មិនមែនជាកូនរបស់សម្តេចនោះទេ ហើយរហូត លោក“ហ៊ុន ម៉ាណែត ធ្លាប់បានទាមទារឲ្យពិនិត្យ DNA ថែមទៀត ។
ក្រោយពីប្រតិកម្ម របស់សម្តេចតេជោ ភាគី គណបក្សសង្គ្រោះជាតិ បានចេញសេចក្តីថ្លែងការណ៍ មួយកាលពីថ្ងៃទី១២ ឧសភា ដោយបដិសេធចំពោះ ការចោទប្រកាន់ណាមួយ មកលើគណបក្សខ្លួនដែលថា ជាអ្នកប្រឌិតព័ត៌មានថា កូនប្រុសច្បងរបស់សម្តេចតេជោ ហ៊ុន សែន ជាកូនប្រុសមេដឹកនាំវៀតណាម ៕
