ភ្នំពេញ៖គិតត្រឹមខែមេសា ដើមឆ្នាំ២០១៦ នេះ មានពលរដ្ឋចំនួន ២៧នាក់ បានស្លាប់ដោយសាររន្ទះបាញ់ និង៧នាក់ ស្លាប់ដោយសារខ្យល់កន្ត្រាក់ ។ គណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ថា ចំនួនអ្នកស្លាប់មានការកើនឡើងខ្លាំងនៅខែមេសា ដោយសារគ្រោះធម្មជាតិមានភាពឃោរឃៅ បើទោះបីជា រាជរដ្ឋាភិបាលបានប្រកាសពីវិធីត្រៀមទប់ស្កាត់ជាមុនក៏ដោយ។
នៅទូទាំងប្រទេសកម្ពុជា គិតត្រឹមខែមេសា ឆ្នាំ២០១៦ នេះ មានមនុស្ស៣៤នាក់បានស្លាប់ដោយ សារគ្រោះមហន្តរាយធម្មជាតិ ។ ក្នុងនោះខ្យល់កន្ត្រាក់បានកើតមាន១១៥ករណី មនុស្សស្លាប់៧នាក់ របួសធ្ងន់ស្រាល២៧នាក់ ខូចខាតផ្ទះជិត១ពាន់ខ្នង ផ្ទះបាក់បែក និងរបើកដំបូលមានជិត៥ពាន់ខ្នង។ ដោយឡែក មនុស្ស ២៧នាក់ បានស្លាប់ដោយសាររន្ទះបាញ់ និងរងរបួសស្រាល ៥០ នាក់ផ្សេងទៀត ។ នេះបើ យោងតាមសេចក្តីរាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ។
គួរបញ្ជាក់ថា ភាពរាំងស្ងួតនៅពេលថ្មីៗនេះ បានធ្វើឲ្យប្រជាជនកម្ពុជាដែលរស់នៅក្នុងស្រុក និងក្រុងចំនួន ៩៣ និងឃុំ សង្កាត់ចំនួន ៣២៧ ទៅទូទាំងប្រទេសប្រមាណ ២លាន ៥សែននាក់ បានរងផលប៉ះ ពាល់។ ក្រៅពីនេះ គ្រោះរាំងស្ងួតក៏បានសម្លាប់សត្វរាប់រយក្បាល ត្រីរាប់សិបតោន និងបណ្តាលឲ្យមានភ្លើងឆេះព្រៃរាប់រយហិកតាទៀតផង។ដោយឡែក នៅដើមរដូវវស្សានេះ មនុស្ស៣៤នាក់បានស្លាប់ដោយសារគ្រោះមហន្តរាយធម្មជាតិក្នុងនោះស្លាប់ដោយរន្ទះបាញ់ចំនួន២៧នាក់ និងស្លាប់ដោយខ្យល់កន្ត្រាក់ ចំនួន ៧នាក់៕អ៊ុក សំអាង
រូបឯកសារ
