អត្ថបទ៖ លោក សុផល
បាត់ដំបង៖ ព័ត៌មានពីប្រជាពលរដ្ឋបានអោយដឹងថា: គ្រោះថ្នាក់ចរាចរណ៍ដ៍គួរអោយរន្ទត់នេះបានកើតឡើងនៅវេលាម៉ោង១២:៤០នាទី ថ្ងៃទី០១ មិថុនា ២០១៦ នេះ ស្ថិតចំណុចផ្លូវបំបែកវៀងក្រុង ក្នុងភូមិសាលាបាឡាត់ សង្កាត់អូរម៉ាល់ ក្រុងបាត់ដំបង។
ហេតុការណ៍នេះ បណ្តាលឱ្យយុវជនម្នាក់ស្លាប់ភ្លាមៗនៅនឹងកន្លែងត្រូវបានគេដឹងថា មានឈ្មោះ មែន សីហា ភេទប្រុស អាយុ២៥ រស់នៅក្នុងភូមិអណ្តូងចេញ សង្កាត់អូរចា ក្រុងបាត់ដំបង ខេត្តបាត់ដំបង ជាម្ចាស់ម៉ូតូរ៉ឺម៉ក រីឯរថយន្តបង្កអ្នកបើកឈ្មោះ រិន អាយុ១៩ឆ្នាំ គេចខ្លួនបាត់ បន្សល់នៅព្រូម្នាក់ឈ្មោះ កែម ស៊ីថូ ភេទប្រុស អាយុ២៩ឆ្នាំ ។
សមត្ថកិច្ចបានអោយដឹងថា: មុនពេលកើតហេតុគេឃើញជនរងគ្រោះជិះម៉ូតូសណ្តោងរ៉ឺម៉កដឹកសាំងធ្វើដំណើរពីទិសខាងលិចឆ្ពោះទៅទិសខាងកើត ដល់ចំណុចកើតហេតុ ត្រូវរថយន្តខាងលើក្នុងបំណងបត់ឆ្វេងក៏ជ្រុលទៅបុកម៉ូតូជនរងគ្រោះបណ្តាលឱ្យខ្ទាតចូលក្រោមរថយន្តកិនទាំងម៉ូតូ និងម្ចាស់ស្លាប់ភ្លាមៗតែម្តង។
រថយន្តបង្កហេតុ ម៉ាកហ៊ីយ៉ាន់ដាយ ជាប្រភេទរថយន្តរបស់ឈ្មួញរកស៊ីដឹកប្រហិតពីប្រទេសថៃ ឆ្ពោះទៅរាជធានីភ្នំពេញ ពាក់ស្លាកលេខភ្នំពេញ ៣D-៤០៨៧៕
