ភ្នំពេញ៖បន្ទាប់ពីមានប្រតិកម្ម ខ្លាំងពីសំណាក់ប្រជាពលរដ្ឋកម្ពុជា ជាពិសេសយុវជនកម្ពុជានៅលើបណ្តាញសង្គមហ្វេសប៊ុកជុំវិញព័ត៌មានដែរថា ប្រទេសថៃមានគម្រោងដាក់ ល្ខោន Khon មានទម្រង់ដូចល្ខោនខោលកម្ពុជា ជាសម្បត្តិបេតិកភណ្ឌពិភពលោកអរូបីនោះ លោក ថៃ នរៈសត្យា រដ្ឋលេខាធិការក្រសួងវប្បធម៌បានឱ្យដឹងថា មិនមែនគ្រប់សំណើដាក់បញ្ចូលជាសម្បត្តិបេតិកភណ្ឌពិភពលោក សុទ្ធតែត្រូវបានអង្គការ យូនីស្កូ ទទួលយកទេ។
ជាក់ស្ដែងសំណើរបស់ថៃដាក់ល្ខោន Khon មានទម្រង់ដូចល្ខោនខោលកម្ពុជា ជាសម្បត្តិបេតិកភណ្ឌពិភពលោកអរូបីក៏ដូច្នេះដែរ ប្រសិនបើភាគីប្រទេសកម្ពុជា ឬប្រទេសណាមួយលើពិភពលោកមានការជំទាស់ អង្គការនឹងពិចារណាចំពោះសំណើរបស់ថៃមិនខាន។
លោក បានបន្ថែមថា “បើប្រទេសថៃនិយាយថា ល្ខោននេះវាកកើតឡើងនៅក្នុងសម័យអយុធ្យាមែន វាកាន់តែជាទឡ្ហីករណ៍មួយបង្ហាញនិង ឆ្លុះបញ្ចាំងឱ្យឃើញពី ប្រវត្តិសាស្ត្រថែមទៀតផង អញ្ចឹង យូនីស្កូ គេអាចពិចារណាបានហើយ”។ បន្ថែមលើពីនេះទៅទៀតក្រសួងវប្បធម៌នៅតែប្រកាន់តួនាទីអភិរក្ស និងអភិវឌ្ឍន៍វប្បធម៌ ដោយមិនព្រងើយកន្តើយចំពោះរឿងដែលធ្វើឱ្យប៉ះពាល់ដល់បេតិកភណ្ឌរបស់ ជាតិឡើយ។ ប៉ុន្តែរហូតមកដល់ពេលនេះ ដោយសារតែក្រសួង នៅមិនទាន់ទទួលបានព័ត៌មានស្ដីពីសំណើរបស់ថៃជាផ្លូវការ ទើបក្រសួងនៅមិនទាន់មានចំណាត់ការណាមួយនៅឡើយ។
លោក ថៃ នរៈសត្យា បានបន្ថែមថា នាយកដ្ឋានស្រាវជ្រាវបច្ចេកទេសវប្បធម៌មានឯកសារតម្កល់គ្រប់គ្រាន់ ទាក់ទងទៅនឹងល្ខោនខោលរបស់ខ្មែរ។ ប៉ុន្តែភាពយឺតយ៉ាវដាក់សំណើទៅអង្គការ យូណេស្កូ ក៏ដោយសារកម្ពុជាកំពុងដំណើរការដាក់បញ្ចូលប្រាសាទសម្បូរព្រៃគុហ៍ ក៏ដូចជាប្រាសាទនានាជាច្រើនទៀត រួមទាំងភ្លេងអារក្ស និងចាប៉ីដងវែងជាដើម៕
