បាត់ដំបង៖ប្រជាពលរដ្ឋចំនួនជាង១០គ្រួសារនៅក្នុងក្រុមទី១ ភូមិរតនះ សង្កាត់រតនះ ក្រុងបាត់ដំបង ខេត្តបាត់ដំបង កាលពីយប់ថ្ងៃទី០៧ ខែមិថុនា ឆ្នាំ២០១៦បានសំដែងក្តីព្រួយបារម្មណ៍ជាខ្លាំងបន្ទាប់ពីសិប្បកម្មទឹកកកពោធិវាលជាញឺកញាប់បែកធ្លាយបំពង់ឧស្ម័នអាម៉ូញ៉ាក់បង្ករការសាយភាយធ្វើអោយប៉ះពាល់ដល់សុខភាពយ៉ាងខ្លាំង។
អ្នកស្រី ភី ម៉ា អាយុ២៣ឆ្នាំបានអោយដឹងនៅថ្ងៃទី០៨ ខែមិថុនានេះថា: នៅថ្ងៃដែលសិប្បកម្មទឹកកកពោធិវាលខាងលើនេះធ្លាយបំពង់ឧស្ម័នបង្ករអោយអ្នកនៅក្បែរសិប្បកម្មនេះមានអាការះចុកទ្រូង ថប់ដង្ហើមហើយខ្យល់ចាប់តែម្តង ចំណែកកូនរបស់លោកស្រីស៊ូទ្រាំមិនហើយស្រែកយុំ ដោយសារមានអាការះក្រហាយហើយហៀរទឹកភ្នែកនិងរមាស់ច្រមុះ។
អ្នកស្រី សុខ ពៅ អាយុ៦៣ឆ្នាំបានអោយដឹងដែរថា: បន្ទាប់ពីទទួលរងនូវការប៉ះពាល់ដោយឧស្ម័នរយះពេលជាង២ម៉ោងជាហេតុនាំអោយលោកស្រីរកកលមិនស្រួលខ្លួនហើយកោសខ្យល់មិនទាន់ចប់ផងទ្រាំមិនបានក៍នាំកូន ចៅទៅសំរាកនៅសណ្ឋាគា ព្រឹកឡើងទើបត្រឡប់មកផ្ទះវិញ។
ចំណែកតំណាងសិប្បកម្មទឹកកកបានបញ្ជាក់ថា: នៅយប់ថ្ងៃទី០៧ ខែមិថុនាកន្លងមកនេះមានការធ្លាយបំពង់ឧស្ម័នមែន ប៉ុន្តែត្រឹមតែ១សន្ទុះប៉ុណ្ណោះក៍រៀបចំផ្សាអោយជិតឡើងវិញ ពេលនេះស្ថានភាពធម្មតាឡើងវិញហើយ។
លោក ជួប សារុន ប្រធានមន្ទីរបរិស្ថានខេត្តបាត់ដំបងបានលើកឡើងថា: លោកមិនបានដឹងពីហេតុប៉ះពាល់នេះទេ ព្រោះមន្ត្រីរបស់លោកមានតិច ហើយបែងចែកទៅកាន់តំបន់ផ្សេងៗពិសេសតំបន់ព្រំដែន លោកនិងចាត់អោយមន្ត្រីរបស់លោកចុះទៅពិនិត្យព្រោះកន្លងមកក្រុមការងារបានចុះសួរនាំដែរតែខាងសិប្បកម្មថា មិនបញ្ហាអ្វីកើតឡើងទេ។
គួរញ្ជាក់ថា: កាលពីថ្ងៃទី០៦ ខែមីនា ឆ្នាំ២០១៦ មានព្រះសង្ឃគង់ក្នុងវត្តពោធិវាលនិងប្រជាពលរដ្ឋចំនួន៥០គ្រួសារជួបរឿងគ្នាហើយស្នើរសុំអោយអាជ្ញាធរខេត្តជួយអន្តរាគមន៍ដោយសារភាពទ្រាំលេងបាននិងការលិចធ្លាយអាម៉ូញ៉ាក់ម្ដងៗបណ្តាលកើតឡើងនូវអាការះដកដង្ហើមតឹង ស្ងួតបំពង់ក ឈឺក្បាល វិលមុខ តឹងទ្រូង ឆ្អិតដើមកហើយហៀរទឹកភ្នែកតែម្ដង ចំណែកក្មេងៗក្ដៅខ្លួន ពិបាកដកដង្ហើម ឡើងមុខក្រហម ហៀរទឹកភ្នែកនិងរលាកផ្លូវដង្ហើមទាមទាសំរាកព្យាបាលនៅមន្ទីរពេទ្យ ក្រៅពីនេះបានបង្ករអោយដំណាំ បន្លែបង្ការមានព្រលឹត ត្រកួន មាន់ទា ឆ្កែឆ្មា ត្រីតូចធំ ខ្យងនិងអន្ទង់ជាដើមងាប់ត្រៀបត្រាពិសេសនៅពេលដែលសិប្បកម្មផលិតទឹកកកពោធិ៍វាលនេះបង្ហូរជាតិអាម៉ូញ៉ាក់ចូលលេចភូមិម្ដងៗ៕ ប៉ែន សុផល
