បាត់ដំបង៖នៅយប់ថ្ងៃ១២ខែមិថុនាឆ្នាំ២០១៦ ដោយបានការអនុញ្ញាតិពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបង ឧត្តមសេនីយ៍ទោ ស ថេត ស្នងការនៃស្នងការដ្ឋាននគរបាលខេត្តបាត់ដំបង បានណែនាំឲ្យកម្លាំងជំនាញ ដែលមានឧត្តមសេនីយ៍ត្រី ជេត វណ្ណនី ស្នងការរងទទួលផែននគរបាលយុត្តិធម៌ ដឹកនាំកម្លាំងបង្ការបង្ក្រាបចេញឃាត់ក្រុមក្មេង ដែលជិះម៉ូតូធុនធំ មានលក្ខណៈទ្រង់ទ្រាយ ( ជាក្រុម ) នៅក្នុងភូមិសាស្ត្រក្រុងបាត់ដំបង ។
ក្នុងប្រតិបត្តិការនេះមានមនុស្សចំនួន ២៣ នាក់ និងម៉ូតូធុនធំចំនួន ២៣ គ្រឿង ត្រូវបាននាំយកមកស្នងការដ្ឋាននគរបាលខេត្តបាត់ដំបង ធ្វើការសាកសួរ និងស្រាវ ជ្រាវ ។ សូមជំរាបជូនថា កន្លងទៅក្នុងភូមិសាស្ត្រក្រុងបាត់ដំបង និងតាមបណ្តាស្រុកមួយចំនួន មានក្រុមក្មេងជិះម៉ូតូធុនធំៗ បង្កភាពអនាធិបតេយ្យ ដោយការជិះក្នុងល្បឿនលឿនៗ បង្កជាសម្លេងម៉ូតូ និងស៊ីប្លេខ្លាំងៗ ជិះជាក្រុមពេញផ្លូវ បង្ហោះ ឬប្រណាំងប្រជែងគ្នា ស្រែកហូរកញ្ចៀវឡូឡា ទាំងយប់អាធ្រាតុ មានករណីខ្លះឈានដល់បង្កហិង្សា វាយតប់ ដេញកាប់ចាក់គ្នាទៀតផង ។
-លោកវរសេនីយ៍ទោ ម៉េង លៀង នាយករិយាល័យនគរបាលព្រហ្មទ័ណ្ឌកំរិតស្រាលនៃស្នងការដ្ឋានបានលើកឡើងថា សកម្ម ភាពទាំងអស់ខាងលើបានធ្វើឲ្យបាត់បង់សណ្តាប់ធ្នាប់របៀបរាបរយសាធារណៈរំខានទាំងការធ្វើដំណើររបស់អ្នកដទៃនិងប៉ះពាល់ ដល់អារម្មណ៍ប្រជាពលរដ្ឋធ្វើដំណើរនៅតាមដងផ្លូវ និងសម្រាក សម្រានពេលយប់អាធ្រាតុ ។ ផ្តើចេញពីករណីខាលើទើប ឧត្តមសេនីយ៍ស្នងការ មានវិធានការប្រមូល ( ក្រុមជិះម៉ូតូធំៗបង្កភាពអនាធិបតេយ្យ ) ទាំងនេះមកធ្វើការសាកសួរ និងអប់រំ ណែនាំ ។ ជាទូទៅក្នុងចំណោមមនុស្ស និងម៉ូតូដែលត្រូវបានឃាត់នាពេលនេះសង្កេតឃើញមានបទល្មើសចំនួន ០៣ គឺ៖១-អ្នកជិះម៉ូតូមិនមានពាក់មួកសុវត្ថិភាពចំនួន០៩នាក់ ២-ម៉ូតូមិនមានបំពាក់ស្លាកលេខចំនួន ១៥ គ្រឿង ៣-ម៉ូតូទាំង ២៣ គ្រឿងនេះ ពិនិត្យឃើញ មានលក្ខណៈកែច្នៃខុសបច្ចេទេសដើម ០៨ គ្រឿង( កែច្នៃតួម៉ូតូ ស៊ីមាំងម៉ូតូ និងស៊ីប្លេម៉ូតូ ) ហើយកញ្ចក់មើលក្រោយមិនមានលក្ខណៈត្រឹមត្រូវគ្រប់ម៉ូតូ ។
-ឧត្តមសេនីយ៍ ជេត វណ្ណនី ស្នងការរងបានអំពាវនាវដល់អាណាព្យាល មាតា បិតា យកចិត្តទុកដាក់អប់រំកូន ការប្រើប្រាស់ មធ្យោបាយណាមួយគឺ ជាសិទ្ឋិរបស់អ្នកប្រើប្រាស់ ប៉ុន្តែការប្រើប្រាស់ដែលមានលក្ខណៈកែច្នៃខុសបច្ចេកទេស និងខុសច្បាប់ ស្តីពីចរាចរណ៍ផ្លូវគោក នោះសមត្ថកិច្ចត្រូវតែអនុវត្តនូវភារកិច្ចរបស់ខ្លួន ដើម្បីធ្វើឲ្យសង្គមមានរបៀបរៀបរយ ។ លោកបន្តថា ចាប់ពីពេលនេះទៅ (ទីតាំងកែច្នៃម៉ូតូធ្វើឲ្យខុសពីលក្ខណៈបច្ចេទេស) មន្ត្រីជំនាញនឹងចុះទៅធ្វើកិច្ចសន្យាឲ្យម្ចាស់បញ្ឈប់សកម្មភាព ប្រសិនបើនៅ តែបន្តម្ចាស់ទីតាំងទាំងនោះនឹងប្រឈមចំពោះមុខច្បាប់ ជាគោលការណ៍ក្រុមក្មេងជិះម៉ូតូធំ ទាំងនេះ នឹង ធ្វើកិច្ចសន្យាអប់រំណែនាំ ហើយតម្រូវឲ្យយកម៉ូតូទៅរៀបចំឲ្យបានត្រឹមត្រូវឡើងវិញ ៕ ប៉ែន សុផល
