ខេត្តបន្ទាយមានជ័យ៖សាកសពក្មេងប្រុសម្នាក់ត្រូវបានគេប្រទះឃើញអណ្តែតក្នុងទឹកស្រះ បន្ទាប់ពីបាត់ខ្លួនមួយយប់ក្រុមគ្រួសារដើររកមិនឃើញ។ ហេតុការណ៍នេះបង្កការភ្ញាក់ផ្អើលកាលពីរសៀលថ្ងៃទី០៤ ខែកក្កដា ឆ្នាំ២០១៦ នៅចំណុចស្រះមួយក្នុងទឹកដីកាស៊ីណូ ក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ។
ក្មេងប្រុសរងគ្រោះឈ្មោះ កក្កដា ទឹម ពិសិដ្ឋ អាយុ១០ឆ្នាំ រស់នៅជាមួយជីដូនក្នុងភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ដោយឪពុកម្តាយរបស់គេទៅធ្វើការនៅឯប្រទេសថៃ។
តាមសាច់ញាតិក្មេងប្រុសរងគ្រោះប្រាប់ថា ក្មេងប្រុសខាងលើបានបាត់ពីផ្ទះនៅរសៀលថ្ងៃទី០៣កក្កដា គឺទៅដើរលេងជាមួយក្មេងៗជាអ្នកជិតខាង ដំបូងគិតថាវង្វេងផ្លូវក៏នាំគ្នាដើររក តែនៅតែរកមិនឃើញ លុះសាកសួរក្រុមក្មេងទៅដើរលេងជាមួយពួកគេប្រាប់ថា បាននាំគ្នាទៅលេងទឹកស្រះចំណុចកើតហេតុ ។ ក្រុមសាច់ញាតិក៏បន្តទៅរកនៅចំណុចកើតហេតុស្រាប់តែឃើញក្មេងរងគ្រោះស្លាប់អណ្តែតទឹកស្លាប់បាត់ទៅហើយ ។
ក្រោយពីសមត្ថកិច្ចត្រួតពិនិត្យ និងធ្វើកំណត់ហេតុរួច សពក្មេងប្រុសរងគ្រោះត្រូវបានប្រគល់ឲ្យសាច់ញាតិយកទៅលំនៅដ្ឋានដើម្បីធ្វើបុណ្យតាមប្រពៃណី ៕
