រាជធានីភ្នំពេញ៖អ្នកបើកម៉ូតូទាំង២នាក់បានដួលបោកក្បាលស្លាប់ភ្លាមៗនៅកន្លែងកើតហេតុ ចំណែកស្ត្រីម្នាក់ទៀតរងរបួសធ្ងន់ក្នុងហេតុការណ៍ម៉ូតូ២គ្រឿងបុកគ្នាចំពីមុខយ៉ាងពេញទំហឹង។ ហេតុការណ៍ នេះកើតឡើងនៅវេលាម៉ោង៨យប់ ថ្ងៃទី១៩ ខែកក្កដា ឆ្នាំ២០១៦ នៅក្បែរផ្ទះសំណាក់ កូប្រា២ តាមបណ្ដោយផ្លូវជាតិលេខ១ ស្ថិតក្នុងភូមិស្វាយតាអុក សង្កាត់វាលស្បូវ ខណ្ឌច្បារអំពៅ ។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញ២នាក់ប្តីប្រពន្ធជិះម៉ូតូម៉ាកសង់កូរ៉េ ពណ៌ក្រហម អត់មានស្លាកលេខ ដឹកបន្លែយកទៅលក់នៅផ្សារច្បារអំពៅតាមផ្លូវជាតិលេខ១ ទិសដៅពីកើតទៅលិច បញ្ច្រាសទិសដៅចរាចរណ៍ ខណៈដល់ចំណុចកើតហេតុ បានឆ្លងបញ្ឆិតផ្លូវ ពេលនោះក៏ស្រាប់តែមានបុរសម្នាក់ជិះម៉ូតូម៉ាកស៊ុយសុគីនិក ពណ៌ស ពាក់ស្លាកលេខ ភ្នំពេញ 1CT-7343 ដែលគេដឹងថា ទើបចេញមកពីទិញសាច់ក្លែមវិញ ដោយធ្វើដំណើរតាមផ្លូវជាតិលេខ១ ទិសដៅពីលិចទៅកើត ក្នុងល្បឿនលឿន ក៏ជ្រុលទៅបុកម៉ូតូដែលជិះគ្នា២នាក់ប្តីប្រពន្ធចំពីមុខពេញទំហឹងបណ្តាលឲ្យអ្នកបើកម៉ូតូទាំង២នាក់ដួលបោកក្បាលទៅនឹងថ្នល់ស្លាប់នៅនឹងកន្លែងតែម្ដង។ ចំណែកស្ត្រីជាប្រពន្ធដែលអង្គុយនៅខាងក្រោយរងបួសបែកក្បាលធ្ងន់ធ្ងរ ត្រូវបានរថយន្តសង្គ្រោះរបស់មន្ទីរបង្អែកមានជ័យដឹកយកទៅសង្គ្រោះនៅមន្ទីពេទ្យកាល់ម៉ែត ចំណែកម៉ូតូខូចខាតផ្នែកទាំងសងខាង ។
សមត្ថកិច្ចបានឲ្យដឹងថា សពជនរងគ្រោះដែលជិះម៉ូតូម៉ាកសង់កូរ៉េមានឈ្មោះ ជុំ ភក្ត្រ ភេទប្រុស អាយុ៤១ឆ្នាំ មុខរបរលក់បន្លែ មានប្រពន្ធឈ្មោះ ប៉ាល សារី អាយុ៥៤ឆ្នាំ មុខរបរលក់បន្លែ ស្នាក់នៅភូមិមិត្តភាព សង្កាត់វាលស្បូវ ខណ្ឌច្បារអំពៅ រងរបួសធ្ងន់ ។ ចំណែកសពជនរងគ្រោះដែលជិះម៉ូតូម៉ាកនិច ឈ្មោះ ឆែម សំណាង ភេទប្រុស អាយុ១៦ឆ្នាំ មុខរបរនៅផ្ទះ ស្នាក់នៅភូមិព្រែកជើងព្រំ សង្កាត់វាលស្បូវ ខណ្ឌច្បារអំពៅ ។
ក្រោយពេលកើតហេតុ សពជនរងគ្រោះទាំងពីរនាក់ត្រូវសមត្ថកិច្ចធ្វើកំណត់ហេតុរួចបានប្រគល់ឲ្យក្រុមគ្រួសារយកទៅធ្វើបុណ្យរៀងៗខ្លួន ។ ចំណែកកម៉ូតូទាំង២គ្រឿងត្រូវបានសមត្ថកិច្ចវាស់វែង រួចយកទៅរក្សាទុកការិយាល័យចរាចរណ៍ផ្លូវគោករាជធានីភ្នំពេញ ដើម្បីធ្វើការដោះស្រាយទៅតាមផ្លូវច្បាប់ ៕
