រាជធានីភ្នំពេញ៖ជនសង្ស័យម្នាក់ក្នុងចំណោម៤នាក់ត្រូវបានកម្លាំងព្រហ្មទណ្ឌកម្រិតស្រាលចាប់ឃាត់ខ្លួន បន្ទាប់ពីធ្វើសកម្មភាពលួចដោះកង់រថយន្ត១គ្រឿងដែលចតនៅតាមចិញ្ចើមផ្លូវ រហូតមានការផ្ទុះអាវុធ២គ្រាប់។ ករណីនេះកើតឡើងកាលពីវេលាម៉ោង១២ និង១០នាទីរំលងអធ្រាត្រឈានចូលថ្ងៃទី២០ ខែកក្កដា ឆ្នាំ២០១៦ តាមបណ្តោយផ្លូវម៉ៅសេទុង នៅចំណុចផ្សារដើមគរ ស្ថិតក្នុងសង្កាត់ផ្សារដើមគរ ខណ្ឌទួលគោក។
ប្រភពព័ត៌មានពីកម្លាំងព្រហ្មទណ្ឌកម្រិតស្រាលបានឲ្យដឹងថា មុនពេលកើតហេតុកម្លាំងល្បាតបានជិះល្បាតម្តុំកៅដាយនៅផ្លូវ២០៥ ក៏បានប្រទះឃើញជនសង្ស័យ៤នាក់កំពុងធ្វើសកម្មភាពលួចដោះកង់រថយន្ត១គ្រឿងដែលចតនៅតាមចិញ្ចើមផ្លូវ ក៏ដេញចាប់ធ្វើឲ្យជនសង្ស័យនាំគ្នារត់ចែកជើងគ្នា ប៉ុន្តែក្នុងចំណោម៤នាក់នោះមានម្នាក់បានរត់ទៅមុខមជ្ឈមណ្ឌលចេនឡាក៏ត្រូវកម្លាំងព្រហ្មទណ្ឌកម្រិតស្រាលផ្ទុះអាវុធចំនួន២គ្រាប់បង្កឲ្យមានការភ្ញាក់ផ្អើលទើបចាប់បានយកទៅសាកសួរនៅទីស្នាក់ការផ្សារដើមគរ ។
ប្រភពបន្តថា ជនសង្ស័យម្នាក់ត្រូវបានឃាត់ខ្លួន ឈ្មោះ ឯក សុធា ភេទប្រុស អាយុ៣២ឆ្នាំ មុខរបរជាអ្នកប៉ះកង់ម៉ូតូនៅផ្សារដើមគរ ស្នាក់នៅសង្កាត់ផ្សារដើមគរ ខណ្ឌទួលគោក ។ ប្រភពបញ្ជាក់ថា ក្រោយពេលសាកសួរហើយ សមត្ថកិច្ចបានបញ្ជូនជនសង្ស័យទៅប៉ុស្តិ៍នគរបាលទួលស្វាយព្រៃ២ដើម្បីធ្វើការសាកសួរបន្តទៀត ហើយជនសង្ស័យក៏បានសារភាពប្រាប់ថា ខ្លួនពិតជាលួចរបស់គេមែនដោយមានបក្សពួកចំនួន៣នាក់ទៀតដែលចូលរួមធ្វើសកម្មភាពលួចកង់រថយន្តនេះ។
ក្រោយពេលកើតហេតុ ជនសង្ស័យបានទៅដល់ប៉ុស្តិ៍ទួលស្វាយព្រៃ២ ហើយក៏មិនមានជនរងគ្រោះមកដាក់ពាក្យបណ្តឹងដែរ សមត្ថកិច្ចក៏បានដោះលែងឲ្យត្រឡប់ទៅវិញ ព្រោះពួកគេសុទ្ធសឹងជាជនអនាថា៕
