ខេត្តកំពត៖កម្លាំងនគរបាលខេត្តតាកែវ សហការជាមួយកម្លាំងនគរបាលខេត្តកំពតបានចាប់ខ្លួនឃាតករម្នាក់ដែលសម្លាប់ស្ត្រីជាមន្ត្រីជាប់កិច្ចសន្យានៅមន្ទីរទេសចរណ៍ខេត្តកណ្តាលនៅតំបន់ទេសចរណ៍ទន្លេបាទី។ ការឃាត់ខ្លួននេះធ្វើឡើងនៅល្ងាចថ្ងៃទី២៥ ខែកក្កដា ឆ្នាំ២០១៦ នៅចំណុចផ្សារតានី ក្នុងស្រុកអង្គរជ័យ ខេត្តកំពត។
មន្ដ្រីនគរបាល បានឲ្យដឹងថា ជនសង្ស័យដែលឃាត់ខ្លួនបានគឺមានឈ្មោះ សាត មករា ហៅនី ភេទស្រី អាយុ២៥ឆ្នាំ រស់នៅភូមិត្រពាំងលាន ឃុំចំបក់ ស្រុកបាទី។ បច្ចុប្បន្នស្ដ្រីជាជនសង្ស័យ កំពុងស្ថិតនៅក្រោមការសាកសួរបន្ដ របស់សមត្ថកិច្ចជំនាញនៅឡើយ។
សូមបញ្ជាក់ថា នៅម៉ោង១០ និង៣០នាទី ព្រឹកថ្ងៃទី២០ ខែកក្កដា ឆ្នាំ២០១៦នេះ នារីវ័យក្មេងឈ្មោះ ជា សុជាតិ អាយុ២៣ឆ្នាំ រស់នៅភូមិព្រែកសំរោង ក្រុងតាខ្មៅ ខេត្តកណ្តាល ហើយជាមន្ត្រីជាប់កិច្ចសន្យា នៅមន្ទីរទេសចរណ៍ខេត្តកណ្តាល ត្រូវបានឃាតក កាប់ពីក្រោយរុញទម្លាក់ទឹក នៅតំបន់ទេសចរណ៍ទន្លេបាទី ស្ថិតក្នុងភូមិទន្លេបាទី ឃុំក្រាំងធ្នង់ ស្រុកបាទី ខេត្តតាកែវ ដោយមិនទាន់ដឹងមូលហេតុនៅឡើយនោះទេ៕
