អ៊ីរ៉ាក់៖មនុស្សយ៉ាងហោចណាស់៦នាក់បានស្លាប់បាត់ជីវិតក្នុងហេតុការណ៍បំផ្ទុះគ្រាប់បែកអត្តឃាតនៅប៉ុស្តិ៍ត្រួតពិនិត្យរបស់ប៉ូលិសនៅសង្កាត់និកាយស៊ីអ៊ីតមួយកន្លែងនៅក្នុងទីក្រុងបាកដាដប្រទេសអ៊ីរ៉ាក់កាលពីម្សិលមិញ។
មន្ត្រីប៉ូលិសបាននិយាយថា អ្នកវាយប្រហារនៅក្នុងទីក្រុងបាកដាដនេះបានធ្វើដំណើរថ្មើរជើងហើយបានបំផ្ទុះគ្រាប់បែកដែលជាប់នឹងខ្លួននៅប៉ុស្តិ៍ប៉ូលិសស្ថិតនៅខាងជើងសង្កាត់ Shula ក្នុងទីក្រុងបាដាដ។ មន្ត្រីប៉ូលិសបន្តថា ក្នុងចំណោមអ្នកស្លាប់ទាំង៦នាក់នេះគឺមន្ត្រីប៉ូលិសចំនួន៣នាក់ និងជនស៊ីវិលចំនួន៣នាក់ ហើយមនុស្សចំនួន១៥នាក់ផ្សេងទៀតបានរងរបួស។
ទោះជាយ៉ាងណារហូតមកដល់ពេលនេះ គេមិនទាន់ឃើញក្រុមណាមួយអះអាងទទួលខុសត្រូវចំពោះការវាយប្រហារនេះទេ ប៉ុន្តែក្រុមសកម្មប្រយុទ្ធស៊ុននីធ្លាប់បានអះអាងទទួលខុសត្រូវចំពោះការវាយប្រហារបែបនេះដែលសំដៅទៅរកកងកម្លាំងសន្តិសុខ និងកន្លែងសាធារណៈជាពិសេសនៅកន្លែងណាដែលមានពលរដ្ឋនិកាយស៊ីអ៊ីតរស់នៅភាគច្រើន៕
