ដោយ៖ប៉ែន សុផល
បាត់ដំបង៖ពលរដ្ឋថាល្បែងស៊ីសងអាប៉ោង បៀរ មួយកន្លែងនៅចំណុចក្រុមទី៦ ស្ថិតក្នុងភូមិស្លាកែត សង្កាត់ស្លាកែត ក្រុងបាត់ដំបងកំពុងបានបើកអោយលេងយ៉ាងគគ្រឹកគគ្រេងដោយមិនមានការទើសភ្នែកពីសមត្ថកិច្ចឡើយ។
យោងតាមការលើកឡើងរបស់ប្រជាពលរដ្ឋបានអោយដឹងថា ល្បែងស៊ីសងអាប៉ោង បៀរមួយកន្លែងខាងលើកំពុងមានការបើកអោយលេងយ៉ាងគគ្រឹកគគ្រេងទាំងយប់ថ្ងៃបង្ករភាពក្រីក្រនិងអសន្តិសុខសង្គម លក់និងបញ្ចាំអស់ទ្រព្យសម្បត្តិ រហូតបង្ករអោយកើតមានអំពើហិង្សាក្នុងគ្រួសារ និងធ្វើអោយកើតមានចោរលួច ចោរឆក់ជាដើម ដែលផ្ទុយនៅនិងគោលនយោបាយភូមិ ឃុំមានសុវត្ថភាពថែមទៀតផង។
ពាក់ព័ន្ធទៅនឹងករណីល្បែងស៊ីសងអាប៉ោង បៀរ ខាងលើ លោក ស៊ី ថារ៉ុត នាយប៉ុស្ដិ៍រដ្ឋបាលស្លាកែតបានប្រាប់សារព័ត៌មានយើងនៅថ្ងៃនេះថា ទីតាំងល្បែងស៊ីសងអាប៉ោង បៀរខាងលើនេះលោកបានចុះទៅមើលហើយ ពេលដែលសមត្ថកិច្ចចុះទៅដល់មិនឃើញមានអ្នកលេងទេ ពេលដែលសមត្ថកិច្ចត្រឡប់មកវិញទើបគេនាំគ្នាលេង។ លោកបន្តថា ការលេងនេះឃើញតែចាស់ៗអត់ការងារធ្វើអង្គុយចាក់លេងមួយពាន់ពីរពាន់ទើបអោយគាត់លេងទៅ។
លោក ប៉ាង ហៀង អធិការក្រុងបាត់ដំបងបានប្រាប់ខាងសារព័ត៌មានយើងតាមរយៈទូរស័ព្ទនៅរសៀលថ្ងៃនេះផងដែរថា៖រឿងល្បែងស៊ីសងអាប៉ោង បៀរខាងលើនេះលោកមិនដែលបានដឹងទេ លោកអគុណណាស់ដែលបានសហការ និងផ្តល់ព័ត៌មានជូន ហើយលោកនឹងទៅចាត់ការរឿងនេះ៕
