ភ្នំពេញ៖តាមកាសែតរស្មីកម្ពុជាចុះផ្សាយ នៅថ្ងៃទី៣០ខែវិច្ឆិកាឆ្នាំ២០១៤នេះ បានសរសេរ ថានៅតាមដែនសមុទ្ររបស់កម្ពុជា មានកោះរហូតដល់ទៅ៦៩ កោះ ដែលជាដែនអេកូឡូស៊ីដ៏សំខាន់នៅក្នុងតំបន់។កាសែតនេះបញ្ជាក់ថាយោងទៅតាមរបាយការណ៍មួយដែលបានកំណត់បង្ហាញនៅក្នុង ព្រឹត្តិបត្តិប្រវត្តិធម្ម ជាតិនៅក្នុងប្រទេសកម្ពុជាដែលបានចេញផ្សាយកាលពីពេលថ្មីៗកន្លងទៅនេះ បានឲ្យដឹងថានៅកម្ពុជាដែលមានឆ្នេរសមុទ្រប្រមាណជា ៤៣៥ គ.ម គឺមានកោះទាំងតូចទាំងធំសរុបប្រមាណជា ៦៩ កន្លែង ។ ប្រជុំកោះទាំងតួចទាំងធំទាំង ៦៩ កន្លែងនេះ គឺមានផ្ទៃដីសរុបប្រមាណ៥៥.៦០០ គម២ ហើយ តំបន់ទាំងនោះ គឺភាគច្រើនគ្របដណ្តប់ដោយផ្កាថ្ម និង ប្រព័ន្ធអេកូឡូស៊ីដែលជាប្រភពសំខាន់សំរាប់ធនធានជីវសាស្ត្រនៅក្នុង ដែន សមុទ្រនៅក្នុងប្រទេសកម្ពុជា ។
ប្រភពដដែលបានឲ្យដឹងថា តំបន់នៅតាមប្រជុំកោះទាំងនោះ គឺមានសក្តានុពល ទាំងសេដ្ឋកិច្ចនិងធម្មជាតិដែលកម្ពុជាគួរតែពង្រឹកការពារ និង អភិរក្ស ជាក់ស្តែងដូចជា នៅ កោះស្តេច ជាដើម ។
កោះស្តេច នេះគឺជាកោះមួយនៅក្នុងចំណោមកោះទាំង ៦៩ នេះ។ កោះនេះគឺមាន ចំងាយប្រមាណជា ៦០គម ប៉ុណ្ណោះពីព្រំដែនថៃ ដែលមានទីតាំងស្ថិតនៅក្នុងស្រុកគីរីសាគរ ខេត្តកោះកុង ។
នៅជិតកោះនេះ គឺមានកោះមួយចំនួនទៀតដែលរួមមានដូចជា កោះអំពល់, កោះអណ្តែត, កោះចាន, កោះដំឡូង, កោះស្មាច់ និង កោះ តូតាំង ។នៅក្នុងនោះ កោះស្មាច់ គឺជាកោះដែលមានទំហំធំជាងគេ គឺប្រហែលជា៣០ ហ.ត ហើយកោះអណ្តែត គឺតូចជាងគេ ដែលមានត្រឹមតែ ៤ ហ.ត ប៉ុណ្ណោះ។
កោះស្តេចសព្វថ្ងៃនេះ គឺមានប្រជាពលរដ្ឋរស់នៅប្រមាណជា៦៧០ គ្រួសារ ដែលមានប្រជាពលរដ្ឋសរុបប្រមាណជា ៤០០០ នាក់ ដែលភាគច្រើនគឺជាអ្នកនេសាទ ៕cen/
ទិដ្ឋភាព នៅឆ្នេមួយកន្លែងនៅលើកោះស្តេច ដែលជាកោះមួយនៅក្នុង ចំណោមកោះនៅដែនសមុទ្រនៅក្នុងប្រទេសកម្ពុជា (រូបថត ៖ អ៊ីនធឺណិត)
