ខេត្តកណ្តាល៖អំពើឃាតកម្មបាញ់សម្លាប់បុរសម្នាក់ ដែលបង្កឲ្យមានការភ្ញាក់ផ្អើលយ៉ាងខ្លាំង នៅល្ងាចថ្ងៃទី១០ ខែសីហា ឆ្នាំ២០១៦ ស្ថិតនៅភូមិកោះខ្នុរ ឃុំព្រែករកា ស្រុកកណ្តាលស្ទឹង ខេត្តកណ្តាល ជនដៃដល់បានប្លុងរថយន្តចោល នៅតាមផ្លូវជាតិលេខ២ ទឹកដីស្រុកបាទី ខេត្តតាកែវ មុនពេលរត់គេចខ្លួនបាត់។ ជនរងគ្រោះមិនទាន់ត្រូវបានគេស្គាល់អត្តសញ្ញាណនៅឡើយទេ អាចសង្ស័យជាជនបរទេសអាយុប្រមាណ៤០ឆ្នាំ។
តាមប្រភពព័ត៌មានដែលសមត្តកិច្ចទទួលបានថា នៅវេលាម៉ោងប្រមាណ៤ និង៣០នាទី គេបានឃើញមានមនុស្ស១ក្រុមមានគ្នា៣នាក់ ទៅឈប់រថយន្តជជែកគ្នានៅសាលាសំណាក់ ត្រង់រង្វង់មូលភូមិកោះខ្នុរ ។ ប្រភពបន្តថា មួយសន្ទុះក្រោយមកស្រាប់តែកើតមានអំពើបាញ់ប្រហារសម្លាប់មនុស្សម្នាក់ ចោលសាកសពនៅទីនោះ ហើយគេបានឃើញរថយន្តម៉ាក់ Vista ពណ៌ការ៉ុត ស្លាកលេខ ៧៩២៥ មួយគ្រឿងបើកគេចខ្លួនបាត់ទៅ ធ្វើឲ្យមានការភ្ញាក់ផ្អើល ។ បន្តិចក្រោយមកក៏មានព័ត៌មានថា រថយន្តនោះត្រូវបានសមត្ថកិច្ចឃាត់បាននៅស្រុកបាទី ពេលនេះសមត្ថកិច្ចជំនាញកំពុងធ្វើការស្រាវជ្រាវបន្ត ។
ប្រភពបញ្ជាក់ថា សមត្ថកិច្ចឃាត់ចាប់បានតែរថយន្តទេ ខ្មាន់កាំភ្លើងបានរត់អស់ហើយ ទោះយ៉ាងណាក្ដីកម្លាំងកងរាជអាវុធ សហការណ៍ជាមួយនគរបាលមូលដ្ឋានកំពុងតាមប្រមាញ់ជនដៃដល់យកមកផ្ដន្ទាទោសតាមច្បាប់ ៕
