ដោយ៖ប៉ែន សុផល
ខេត្តបាត់ដំបង៖ប្រជាពលរដ្ឋក្នុងឃុំព្រៃត្រឡាច ស្រុករុក្ខគិរី ខេត្តបាត់ដំបង និងអាណាព្យាបាលសិស្សមិនតិចជាង៤០គ្រួសារបានទទូចសុំអោយអាជ្ញាធរពាក់ព័ន្ធជួយជួសជុលផ្លូវ១ខ្សែប្រវែង១០គីឡូម៉ែត្រដើម្បីសម្រួលដល់ការធ្វើដំណើរ និងងាយស្រួលទៅសាលារៀនរបស់កូន ចៅ។
លោក ផល ម៉ៃ អាយុ៥២ឆ្នាំ រស់នៅក្នុងភូមិរូង១ ឃុំព្រៃត្រឡាច ស្រុករុក្ខគិរីនៅថ្ងៃទី០៩ ខែសីហាបានប្រាប់អោយដឹងថា ផ្លូវ១ខ្សែប្រវែង១០គីឡូម៉ែត្រតភ្ជាប់ពីផ្លូវធំក្នុងភូមិព្រៃខ្លួតមកដល់ភូមិរូង១ដែលប្រជាពលរដ្ឋក្នុងមូលដ្ឋាននេះទៅមក រួមទាំងអ្នកក្រៅភូមិជាច្រើនផ្សេងទៀតតែងតែធ្វើដំណើរ ពេលនេះមានសភាពពិបាកធ្វើដំណើរធ្ងន់ធ្ងរដោយជង្ហុកធំៗជាច្រើនហើយរអិលខ្លាំងនៅពេលភ្លៀងធ្លាក់ម្ដងៗពិសេសនៅរដូវវស្សា។ លោកបន្តថា ការពិបាកនេះមានរយៈពេល៣ទៅ៤ឆ្នាំមកហើយដែលពេលមុនធ្លាប់ជិះម៉ូតូតែ៣០នាទី តែពេលនេះត្រូវប្រើប្រាស់ពេលវេលាជាង១ម៉ោង បើធ្លាក់ភ្លៀងត្រូវរអិល និងជួបគ្រោះថ្នាក់ជាបន្ដបន្ទាប់ធ្លាក់រាំងស្ទះមិនអាចធ្វើដំណើររួចសូម្បីតែគោយន្ដ។
អ្នកស្រី ក្រូច ទូវ អាយុ៥៤ឆ្នាំរស់នៅក្នុងឃុំព្រៃត្រឡាចបានត្អូញត្អែរដែរថា ទាក់ទងទៅនឹងផ្លូវពួកគាត់មានការព្រួយបារម្ភ និងមានការនឿយហត់ជាខ្លាំងក្នុងពេលចាំបាច់ត្រូវធ្វើដំណើរម្ដងៗដូចជាពេលឈឺថ្កាត់ផ្សេងៗ ស្ត្រីទៅសំរាលកូនការដឹកកសិផលទៅកាន់ទីផ្សារផងដែរ ក្រៅពីនេះការលំបាកក្នុងការធ្វើដំណើររបស់កូនៗជាសិស្សសាលាជិះកង់ឬម៉ូតូមិនរួច បង្ខំចិត្តត្រូវដើរដោះស្បែកជើងក្នុងចម្ងាយផ្លូវឆ្ងាយជាហេតុទៅដល់សាលាមិនទាន់ម៉ោងឬត្រូវដួល និងសាចទឹកតាមផ្លូវប្រលាក់ខោអាវសជារឿយៗ។
លោក ម៉ន ឈឿង អនុភូមិរូង១បានបញ្ជាក់ដែរថា ផ្លូវ១ខ្សែខាងលើនេះជាសរសៃឈាមសេដ្ឋកិច្ចសម្រាប់កសិករក្នុងមូលដ្ឋាននេះនិងប្រជាពលរដ្ឋនៅក្រៅភូមិជាច្រើនផ្សេងទៀតដែលឆ្លងកាត់ទៅមកទាំងព្រលប់យប់ថ្ងៃព្រោះផ្លូវនេះតភ្ជាប់ពីផ្លូវធំក្នុងតំបន់ទីប្រជុំជនស្រុកទៅកាន់ភូមិ ស្រែនិងចំការរបស់ប្រជាពលរដ្ឋជាច្រើន។
មេឃុំព្រៃត្រឡាចលោក ភីន ផុន បានគូសបញ្ជាក់ថា មូលនិធិឃុំក្នុងឆ្នាំ២០១៦នេះបានសម្រេចដាក់គម្រោងទៅកាន់ភូមិបឹងចករួចផុតហើយ ដោយសារនៅតំបន់នោះស្ថានភាពផ្លូវមានសភាពលំបាកខ្លាំងជាងពីព្រៃខ្លូតដល់ចុងរូង ប៉ុន្ដែអាចនឹងដាក់គម្រោងនៅឆ្នាំក្រោយអាស្រ័យលើការជួបពិភាគ្សាគ្នាជាមួយក្រុមការងារក្រុមប្រឹក្សាឃុំ។
ចំណែកលោក អ៊ុក គង់ អភិបាលរងស្រុករុក្ខគីរីបានលើកឡើងថា ផ្លូវ១ខ្សែក្នុងកំណាត់ពីផ្លូវបំបែកភូមិព្រៃខ្លូតដល់ភូមិរូង១មានគម្រោងជួសជុលហើយដោយក្រុមការងារចុះជួយស្រុក ប៉ុន្ដែបានត្រឹកតែចម្ងាយផ្លូវ៥គីឡូម៉ែត្រប៉ុណ្ណោះពីដើមផ្លូវបំបែកដល់ចំនុចវត្តព្រៃត្រឡាចនៅសល់ប្រវែង៥៦០០គីឡូម៉ែត្រទៀត លោកសូមអំពាវនាវជាថ្មីទៀតដល់អង្កការជាតិ អន្ដរជាតិ អាជ្ញាធរខេត្តពិសេសរាជរដ្ឋាភិបាល មេត្តាជួយជួសជុលសម្រួលដល់ការធ្វើរដំណើររបស់ប្រជាពលរដ្ឋព្រោះផ្លូវ១ខ្សែនេះមានសារះសំខាន់ជាតំបន់រដ្ឋបាលមានប្រជាពលរដ្ឋរស់នៅច្រើននិងស្រែចំការក៍ច្រើនដូចគ្នា៕
