ភ្នំពេញ៖បុរសម្នាក់ដែលស្គាល់ថា ជាអ្នកបើកបររថយន្តរបស់ក្រុមហ៊ុនផែស្ងួតតេងឡាយ ត្រូវបានគេប្រទះឃើញដេកស្លាប់នៅក្នុងកាប៊ីនរថយន្តកុងតឺន័រមួយគ្រឿងដែលឈប់ចតនៅក្នុងផែរបស់ក្រុមហ៊ុនដោយមិនដឹងមូលហេតុ។
ហេតុការណ៍នេះបង្កឲ្យមានការភ្ញាក់ផ្អើលឡើង កាលពីវេលាម៉ោង៩ព្រឹក ថ្ងៃទី១១ ខែសីហា ឆ្នាំ២០១៦ស្ថិតនៅក្នុងផែស្ងួតតេងឡាយដែលមាន មានទីតាំងស្ថិតនៅតាមបណ្ដោយផ្លូវអូរឌឹមកប់ស្រូវ ភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ ។
បុរសម្នាក់នោះឈ្មោះ ផាត់ វីរៈហៅរឿង អាយុ៣០ឆ្នាំមានស្រុកកំណើតនៅក្នុងភូមិក្រោលគោ ឃុំក្រោលគោ ស្រុកស្វាយជ្រុំ ខេត្តស្វាយរៀងនិងស្នាក់នៅក្នុងក្រុមហ៊ុនខាងលើ។ បុរសបានដេកស្លាប់នៅក្នុងកាប៊ីនរថយន្ត១គ្រឿង ម៉ាកនីស្សាន់ឌីសែល ពណ៌ខៀវពាក់ស្លាកលេខ ភ្នំពេញ3A-8639។
ក្នុងករណីខាងលើនេះខាងក្រុមហ៊ុនតេងឡាយដែលបានព្យាយាមលាក់បាំងមិនបញ្ជាក់ពីមូលហេតុអ្វីឡើយនិងបាន ដេញអ្នកសារព័ត៌មានមិនអោយចូលទៅយកហេតុការណ៍មួយនេះទៀតផង។
ក្រោយពេលមានហេតុការណ៍នេះនិងមានការលេចឮរឿងនេះជាសាធារណៈក៏ដោយ មិនទាន់មានតំណាងក្រុមហ៊ុន និងសមត្ថកិច្ចណាអះអាងថា បុរសនោះស្លាប់ដោយសារអ្វីដែរ៕
