សមត្ថកិច្ចមិនទាន់ដោះលែងសកម្មជនដីធ្លីបឹងកក់២នាក់ពាក់ព័ន្ធយុទ្ធនាការអាវខ្មៅ
រាជធានីភ្នំពេញ៖សកម្មជនដីធ្លីបឹងកក់២នាក់ ដែលត្រូវសមត្ថកិច្ចឃាត់ខ្លួនកាលពីរសៀលម្សិលមិញនោះ រហូតមកដល់ពេលនេះមិនទាន់ត្រូវបានដោះលែងនៅឡើយទេ។
សូមបញ្ជាក់ ថា សកម្មជនដីធ្លីបឹងកក់២នាក់ គឺអ្នកស្រី ទេព វណ្ណី និង ប៊ូវ សោភា ត្រូវបានកម្លាំងគណ:បញ្ជាការឯកភាពខណ្ឌដូនពេញ នៅល្ងាចថ្ងៃទី១៥ ខែសីហា ឆ្នាំ២០១៦ ចុះទៅឃាត់ខ្លួន ខណ:ដែលពួកគេ បាននិងកំពុងធ្វើសកម្មភាពយុទ្ធនាការអាវខ្មៅ។
យុទ្ធនាការអាវខ្មៅរបស់សកម្មជនដីធ្លីខាងលើនេះ មិនត្រឹមតែប្រើរូបភាព ជាលក្ខណ:ប្រមូលផ្តុំនោះឡើយ គឺពួកគេបានធ្វើរួបត្លុក ជាមនុស្សដោយសរសេរថា មន្ត្រីពុករលួយ តុលាការ អ្នកបញ្ជាសម្លាប់ និងឃាតក។
ពួកគេបានយករូបត្លុកទាំងនេះ ទៅកប់ចោលនៅក្នុងរណ្តៅដែលជីករួច ស្ថិតនៅទីតាំងបឹងកក់ សង្កាត់ស្រះចក ខណ្ឌដូនពេញ៕
