ដោយ៖ប៉ែនសុផល
បាត់ដំបង៖ក្រុមអ្នកសារព័ត៌មាន៤នាក់បានប្រឈមនឹងការបោកកាមេរ៉ាចោលពីសំណាក់មេការរបស់ឈ្មួញរកស៊ីជ្រូកនាំចូលពីប្រទេសថៃ។
ប្រភពព័ត៌មាននៅកន្លែងកើតហេតុបានបង្ហើបអោយដឹងថា នៅវេលាម៉ោង១០ និង១៥នាទី ថ្ងៃទី២៤ ខែសីហា ឆ្នាំ២០១៦កន្លងមកនេះ អ្នកសារព័ត៌មានចំនួន៤នាក់ក្នុងគោលបំណងចុះផ្ដិតយករូបភាពជ្រូកដែលឈ្មួញដឹកតាមរថយន្ដរបស់ថៃយ៉ាងគគ្រឹកគគ្រេង និងត្រូវផ្ទេរចុះនៅស្ដង់ស្ដុក១កន្លែងក្បែរច្រកទ្វារព្រំដែនគីឡូ១៣ ក្នុងភូមិត្រពាំងព្រលឹត ឃុំសន្តិភាព ត្រូវមេការជើងខ្លាំងចំនួន២នាក់ដែលគេស្គាល់ថាម្នាក់ឈ្មោះ ឆាង បានចេញមករារាំង ឈានដល់ការគំរាមជេរប្រមាថ និងប្រតាយប្រតប់គ្នាមួយប្រាវថែមទាំងព្យាយាមទាញយកកាមេរ៉ា១គ្រឿងបំរុងនឹងបោកចោលផងដែរ ប៉ុន្ដែត្រូវអ្នកសារព័ត៌មានការពារបាន។
ក្រុមអ្នកសារព័ត៌មានដែលជួបហេតុខាងលើមានមកពីអង្គភាពសារព័ត៌មានខ្មែរម្ចាស់ស្រុកចំនួន២នាក់ សារព័ត៌មាននិសិត្សក្មេងវត្តម្នាក់ និងភ្ញាក់ងារវិទ្យុអាស៊ីសេរីប្រចាំខេត្តបាត់ដំបងម្នាក់ផងដែរ។
មូលហេតុដែលក្រុមសារព័ត៌មានចុះដើម្បីថតយករូបភាពជ្រូកក្រៅបរិវេណស្ដង់នេះ បន្ទាប់ពីបែកធ្លាយថាក្រុមឈ្មួញបានដឹកជ្រូកចូលលើសច្បាប់អនុញ្ញាតទ្វេគុណ ហើយត្រូវមន្ដ្រីពាក់ព័ន្ធមាត់ច្រកទ្វារត្រូវរ៉ូវគ្នាដោយបិទបាំងអោយនាំចូលមិនតិចជាង១០ឡានប្រភេទយ៉ីឌុបឡើយក្នុង១ថ្ងៃៗបើទោះបីកសិដ្ឋានចិញ្ចឹមជ្រូកក្នុងស្រុករងការប៉ះពាល់ធ្ងន់ធ្ងរខ្លាំងបែបណាក៍ដោយ ម្យ៉ាងទៀតការនាំចូលនេះពេលខ្លះក៍មានសត្វជ្រូកងាប់ផងដែត្រូវឈ្មួញក្នុងស្រុកធានាទិញក្នុងតម្លៃថោកដើម្បីព្រលះសាច់លក់ ដែលប្រការនេះផ្ទុយពីច្បាប់អនុញ្ញាតិទាំងស្រុង។
មកទល់ម៉ោងនេះនៅមិនទាន់មានការដោះស្រាយណាមួយនៅឡើយទេ ប៉ុន្ដែភាគីក្រុមអ្នកសារពត៌មាននៅតែប្រកាន់ជំហរចង់ផ្ដិតយករូបភាពពាក់ពន្ធ័ខាងដើមដើម្បីផ្សព្វផ្សាយពត៌មានជូនដល់មហាជនបានជ្រាប។
ឆ្លើយតបជុំវិញបញ្ហានេះលោកឆាង មេការស្តង់ស្តុកជ្រូកនេះមិនអាចទំនាក់ទំនងបានឡើយ។
គួរបញ្ជាក់ថា ស្ដង់ផ្ទេរជ្រូកមានទីតាំងជិតហាងជំនោរជាយដែនខាងលើនេះកន្លងមកធ្លាប់រងការរិះគន់យ៉ាងខ្លាំងពីសំណាក់ប្រជាពលរដ្ឋជាច្រើនព្រោះស្ដង់ស្ដុកជ្រូកបន្ទាប់ពីទំលាក់ជ្រូកចុះ ហើយបានលាងបាញ់ទឹកជ្រូកជាទំលាប់ដែលបង្ករអោយទឹកកក្វក់នេះបានហូរចូលទៅក្នុងអូរដែលពួកគាត់ប្រើប្រាស់ជាប្រចាំថ្ងៃ៕
