កូរ៉េខាងជើង៖កាសែតមួយរបស់កូរ៉េខាងត្បូងបានរាយការណ៍នៅថ្ងៃអង្គារថា ប្រទេសកូរ៉េខាងជើងបានប្រហារជីវិតមន្ត្រីពីរនាក់ជាសាធារណៈនៅដើមខែសីហានេះសម្រាប់ការមិនគោរពមេដឹកនាំលោកគីមជុងអ៊ុន។ បើសិនជាព័ត៌មាននេះត្រូវបានបញ្ជាក់មែននោះ វានឹងក្លាយជាការបោសសម្អាតចុងក្រោយបំផុតក្រោមការគ្រប់គ្រងរបស់មេដឹកនាំវ័យក្មេងរូបនេះ។
កាសែតចេញប្រចាំថ្ងៃ JoongAng Ilbo បាននិយាយថា អតីតរដ្ឋមន្ត្រីក្រសួងកសិកម្ម Hwang Min និងលោក Ri Yong Jin ដែលជាមន្ត្រីជាន់ខ្ពស់នៅក្រសួងអប់រំត្រូវបានប្រហារជីវិត។
លោកគីមបានឡើងកាន់អំណាចក្នុងឆ្នាំ២០១១បន្ទាប់ពីការស្លាប់នៃឪពុករបស់លោកគឺលោកគីមជុងអ៊ីលហើយការពង្រឹងអំណាចរបស់លោកគឺរួមបញ្ចូលការធ្វើវិសុទ្ធកម្មនិងការប្រហារជីវិតនៃក្រុមមន្ត្រីកំពូលៗ។ នេះបើតាមការលើកឡើងរបស់ក្រុមមន្ត្រីកូរ៉េខាងត្បូង។
ទោះបីជាយ៉ាងណាក៏ដោយ របាយការណ៍នេះមិនអាចត្រូវបានផ្ទៀងផ្ទាត់បានទេហើយក្រសួងបង្រួបបង្រួមរបស់កូរ៉េខាងត្បូងដែលគ្រប់គ្រងបញ្ហាទាក់ទងនឹងប្រទេសកូរ៉េខាងជើងក៏មិនមានការអត្ថាធិប្បាយជាបន្ទាន់ណាមួយដែរ។
កាសែត JoongAng Ilbo បាននិយាយថាបុរសទាំងពីរនាក់នេះត្រូវបានប្រហារជីវិតដោយកាំភ្លើងបាញ់យន្តហោះនៅក្នុងបណ្ឌិតសភាយោធាក្នុងទីក្រុងព្យុងយ៉ាង។
របាយការណ៍នៃការប្រហារជីវិតនេះបានធ្វើឡើងភ្លាមៗបន្ទាប់ពីកូរ៉េខាងត្បូងនិយាយថា ឯកអគ្គរដ្ឋទូតរងរបស់កូរ៉េខាងជើងក្នុងទីក្រុងឡុងដ៍បានចុះចូលហើយមកដល់ក្នុងប្រទេសកូរ៉េខាងត្បូងជាមួយក្រុមគ្រួសាររបស់គាត់ដែលនេះជារឿងដ៏អាម៉ាស់មួយសម្រាប់របបរបស់លោក គីម។
គួរបញ្ជាក់ថា អតីតរដ្ឋមន្ត្រីក្រសួងការពារជាតិម្នាក់ក៏ត្រូវបានគេជឿរថា ត្រូវប្រហារជីវិតផងដែរកាលពីឆ្នាំមុនសម្រាប់អំពើក្បត់ជាតិ។ នេះបើតាមការឲ្យដឹងពីទីភ្នាក់ងារចារកម្មរបស់កូរ៉េខាងត្បូង៕
