ដោយ៖ប្រុញ វិធិន
ខេត្តក្រចេះ៖នៅព្រឹកថ្ងៃទី៣១ ខែសីហា ឆ្នាំ២០១៦នេះ កម្លាំងនគរបាលការិយាល័យព្រហ្មទណ្ឌកំរិតធ្ងន់ខេត្តក្រចេះបញ្ជូនជនសង្ស័យបីនាក់ ទៅតុលាការពីបទប្រើប្រាស់អាវុធខុសច្បាប់ និងបាញ់រះទៅលើទូកអ្នកនេសាទ។
ក្រោយពីមានការចុះស្រាវជ្រាវយ៉ាងយកចិត្តទុកដាក់ពីកម្លាំងនគរបាលព្រហ្មទណ្ឌស្រុកសំបូរ សហការជាមួយ កម្លាំងនគរបាលព្រហ្មទណ្ឌខេត្ត ក្រោមការបញ្ជារផ្ទាល់ពីលោកឧត្តមសេនីយ៍ត្រី លន់ សុផាត ស្នងការនគរបាលខេត្តក្រចេះ កម្លាំងនគរបាលស្រុកសំបូរ បានឈានដល់ការកំណត់មុខសញ្ញា និងការឃាត់ខ្លួនជនសង្ស័យ ៣នាក់ ជាបន្តបន្ទាប់ ក្រោយពេលបាញ់រះទៅលើទូកអ្នកនេសាទតាមដងទន្លេមេគង្គ បណ្តាលអោយរងរបួសបុរសម្នាក់ត្រង់ត្រគៀកជាទំងន់កាលពីថ្ងៃទី២៦ ខែសីហារ ឆ្នាំ២០១៦ នៅចំណុចអន្លង់ត្រឡោកកន្ទុយកោះតាចាន់ ភូមិពន្ធជា ឃុំអូរគ្រៀង ស្រុកសំបូរ ខេត្តក្រចេះ។
លោក ណយ ស៊ីថាច បានអោយដឹងថា ជនសង្ស័យទី១ ឈ្មោះ ទីល ខាន អាយុ ៤៨ឆ្នាំ ជាជនជាតិព្នង មានមុខរបរ ជាសមាជិកសហគមន៍នេសាទ រស់នៅភូមិពន្ធជា ឃុំអូរគ្រៀង ស្រុកសំបូរ ជាឪពុករបស់ជនដៃដល់ ត្រូវចាប់ឃាត់ខ្លួនបាន កាលពីរសៀលថ្ងៃទី២៨ ខែសីហា ស្ថិតនៅលើកោះមួយកណ្តាលទន្លេមេគង្គនៃស្រុកសំបូរ ព្រមទាំងដកហូតបានអាវុធកែច្នៃ ចំនួន ៣ដើម និងអាការស្វាយត្រង់ ចំនួន ១ដើម ដែលមានគ្រាប់ចំនួន ៣១គ្រាប់ ។
លុះដល់ថ្ងៃទី២៩ ខែសីហា សមត្ថកិច្ច ក៏បានឈានទៅឃាត់ខ្លួនជនសង្ស័យ ២នាក់បន្ថែមទៀត ទី១ ឈ្មោះ សុខ អាចិត ហៅ សុខ បាន អាយុ២៣ឆ្នាំ ជាជនដៃដល់ដែលបានបាញ់រះទៅលើជនរងគ្រោះ និងជនសង្ស័យម្នាក់ទៀតឈ្មោះ ក្រើត ដា អាយុ ២២ឆ្នាំ ជាអ្នកបើកទូក ជនសង្ស័យទាំងពីរនាក់ ជាជនជាតិព្នង ជាសមាជិកសហគមន៍នេសាទ រស់នៅភូមិពន្ធជា ឃុំអូរគ្រៀង ស្រុកសំបូរ ខេត្តក្រចេះ ។
លោក ណយ ស៊ីថាច បន្ដទៀតថា ក្រោយពីនាំខ្លួនជនសង្ស័យទាំងពីរនាក់ទៅសួរនាំនៅអធិការស្រុកសំបូរ ទាំងពីរបានឆ្លើយសារភាពថា ខ្លួនពិតជាបានយកកាំភ្លើងអាការស្វាយត្រង់បាញ់រះទៅលើជនរងគ្រោះចំនួន ៧គ្រាប់ បណ្ដាលឲ្យរងរបួសធ្ងន់មែន ព្រោះជនរងគ្រោះ ជាជនល្មើសឆក់ត្រី ហើយខ្លួនចុះបង្ក្រាបបទល្មើសនេសាទ។
បច្ចុប្បន្ន ជនសង្ស័យទាំង៣នាក់ ត្រូវបានឃុំខ្លួនបណ្ដោះអាសន្ននៅការិយាល័យព្រហ្មទណ្ឌកំរិតធ្ងន់ ដើម្បីកសាងសំណុំរឿងបន្ថែម និងបញ្ជូនបន្តទៅកាន់ស្ថាប័នអយ្យាការមសាលាដំបូងខេត្ត នៅព្រឹកថ្ងៃនេះ ដើម្បីផ្តន្ទាទោសទៅតាមច្បាប់៕
