រាជធានីភ្នំពេញ៖លោកស្រី ទេព វន្នី តំណាងសហគមន៍បឹងកក់ ត្រូវបានសមត្ថកិច្ចនាំខ្លួនមកតុលាការ ដើម្បីសាកសួរ ខណដែលនៅខាងក្រៅបរិវេណតុលាការក៏មានសកម្មជនបឹងកក់ប្រមាណ២០នាក់ កំពុងប្រមូលផ្ដុំគ្នាដើម្បីទាមទារឲ្យដោះលែងលោកស្រី ទេព វន្នី ផងដែរ ។
គួររំលឹកថា សកម្មជនបឹងកក់ អ្នកស្រី ទេព វន្នី បន្តជាប់ឃុំក្នុងពន្ធនាគារ ខណៈដៃគូ គឺ អ្នកស្រី បូវ សោភា ត្រូវបានដោះលែងឲ្យមានសេរីភាពឡើងវិញ បន្ទាប់ពីត្រូវឃាត់ខ្លួនអំឡុងពេលយុទ្ធនាការអាវខ្មៅ នាពេលកន្លងទៅ ។
យោងតាមការចោទប្រកាន់របស់តុលាការកន្លងមកនេះ គឺលោកស្រី ទេព វន្នី ត្រូវបន្តជាប់ឃុំក្នុងពន្ធនាគារ ដោយនៅមានពីរករណីផ្សេងទៀត នៅស្ថាប័នតុលាការ ដូចជាករណីទី១ បទល្មើសហិង្សាដោយចេតនាមានស្ថានទម្ងន់ទោស និងករណីទីពីរ បទល្មើសប្រមាថអ្នករាជការ សាធារណៈ និង បទប្រឆាំងអ្នករាជការសាធារណៈ មានស្ថានទម្ងន់ទោស៕
