ខេត្តកណ្តាល៖បុរសម្នាកបានស្លាប់នៅនឹងកន្លែងយ៉ាងអាណោចអាធ័មដោយសារគ្រោះថ្នាក់ចរាចរណ៍រថយន្តបុកម៉ូតូកាលពីវេលាម៉ោង១៨ និង៤៥នាទីយប់ថ្ងៃទី០៨ ខែកញ្ញា ឆ្នាំ២០១៦ នៅតាមបណ្តោយផ្លូវជាតិលេខ១ត្រង់ចន្លោះគីឡូម៉ែត្រលេខ ២៥.២៦ ក្នុងភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល ។
ជនរងគ្រោះមានឈ្មោះ សោម រាយ ភេទប្រុស អាយុ២២ឆ្នាំ មានទីលំនៅភូមិពពាលខែ ឃុំដីឥដ្ឋ ស្រុកកៀនស្វាយ មុខរបរកសិករ(ស្លាប់)ជិះម៉ូតូម៉ាកសង់កូរ៉េពណ៌ក្រហមគ្មានស្លាកលេខគ្មានភ្លើងបំភ្លឺផ្លូវ។
ចំណែករថយន្តបង្កប្រភេទកុងត័រនឺសន្តោងរ៉ឺម៉កម៉ាកDAEWOពណ៌ខៀវពាក់ស្លាកលេខភ្នំពេញ3B-2775អ្នកបើកបរមិនស្គាល់អត្តសញ្ញាណ(រត់គេចខ្លួនបាត់)។
ប្រភពពីកន្លែងកើតហេតុបានឲ្យដឹងថាមុនកើតហេតុគេឃើញជនរងគ្រោះបើកម៉ូតូក្នុងទិសដៅអ្នកលឿងភ្នំពេញ) មកដល់កន្លែងកើតហេតុក៍ស្រាប់តែមានរថយន្តបង្កបើកក្នុងទិសដៅភ្នំពេញ អ្នកលឿង(ក្នុងទិសដៅច្រាសគ្នា)បានវ៉ាជែងជាមួយរថយន្តធនធំមួយគ្រឿងទៀតក៏ជ្រុលមកបុកម៉ូតូជនរងគ្រោះចំពីមុខចំហៀងខាងស្តាំពេញទំហឹងបណ្តាលជនរងគ្រោះស្លាប់នៅនិងកន្លែងកើតហេតុ។ចំណែករថយន្តបង្កបានបើកបន្តដំណើរទៅមុខបានប្រហែល៥០ម៉ែត្រក៏ឈប់អ្នកបើកបរបានរត់គេចខ្លួនបាត់ស្រមោល៕
