ប៉េកាំង៖នាយករដ្ឋមន្ត្រីចិនលោក Li Keqiang បានប្រាប់នាយករដ្ឋមន្ត្រីវៀតណាមលោក Nguyen Xuan Phuc ថាប្រទេសចិននិងវៀតណាមគួរតែធ្វើការរួមគ្នាដើម្បីរក្សាសន្តិភាពនិងស្ថិរភាពនៅសមុទ្រចិនខាងត្បូងហើយត្រួតពិនិត្យនិងគ្រប់គ្រងជម្លោះ។
ក្រសួងការបរទេសចិនបានឲ្យដឹងនៅថ្ងៃអង្គារថា ក្នុងជំនួបនៅទីក្រុងប៉េកាំងកាលពីថ្ងៃចន្ទ លោក Li បានប្រាប់លោក Phuc ថា សមុទ្រចិនខាងត្បូងគឺជាប់ពាក់ព័ន្ធទាំងបញ្ហាសិទ្ធិអធិបតេយ្យភាពនិងដែនសមុទ្រព្រមទាំងអារម្មណ៍ជាតិផងដែរ។
លោក Li បាននិយាយថា “ប្រទេសចិននិងវៀតណាមគួរប្រឹងប្រែងធ្វើការរួមគ្នា គោរពយ៉ាងប្រយ័ត្នប្រយែងតាមការមូលមតិគ្នាកម្រិតខ្ពស់ រក្សានូវស្ថិរភាពដែនសមុទ្រ គ្រប់គ្រងនិងពិនិត្យជម្លោះ លើកកម្ពស់កិច្ចសហប្រតិបត្តិការតាមសមុទ្រ រួមគ្នារក្សាសន្តិភាពក្នុងតំបន់ដែនសមុទ្រ និងបង្កើតលក្ខខណ្ឌសម្រាប់ការអភិវឌ្ឍដែលមានស្ថិរភាពនៃចំណងទំនាក់ទំនងទ្វេភាគី”។
ក្រសួងនេះបានលើកឡើងពីសំដីរបស់លោក Phuc ដែលបាននិយាយថា បញ្ហាដែនសមុទ្រគួរតែត្រូវបានដោះស្រាយឲ្យបានត្រឹមត្រូវក្នុងរបៀបសន្តិវិធីឈរលើមូលដ្ឋាននៃសមភាពនិងគោរពគ្នាទៅវិញទៅមកហើយមិនអនុញ្ញាតឲ្យបញ្ហាដែនសមុទ្រនេះប៉ះពាល់ដល់ការវិវឌ្ឍន៍នៃទំនាក់ទំនងរវាងប្រទេសទាំងពីរឡើយ។
ប្រទេសចិនបានទាមទារស្ទើរតែទាំងអស់នៃសមុទ្រចិនខាងត្បូងដែលជាកន្លែងមានការធ្វើពាណិជ្ជកម្មឆ្លងកាត់តម្លៃ៥ពាន់ពាន់លានដុល្លារជារៀងរាល់ឆ្នាំ។ ប្រ៊ុយណេ ម៉ាឡេស៊ី ហ្វីលីពីនកោះតៃវ៉ាន់និងវៀតណាមក៏បានទាមទារសមុទ្រនេះផងដែរដែលគេជឿថាជាប្រភពនៃប្រេងនិងឧស្ម័ន។
តុលាការអាជ្ញាកណ្តាលនៅទីក្រុងឡាអេកាលពីខែកក្កដាបានសម្រេចថា ការទាមទាររបស់ប្រទេសចិនក្នុងផ្លូវទឹកនេះគឺមិនត្រឹមត្រូវទេបន្ទាប់ពីករណីនេះត្រូវបាននាំយកទៅដោយប្រទេសហ្វីលីពីន។ ទោះជាយ៉ាងណាក្តីក្រុងប៉េកាំងបានបដិសេធទទួលស្គាល់សេចក្តីសម្រេចនេះ។
ប៉ុន្តែវៀតណាមបានស្វាគមន៍ចំពោះសេចក្តីសម្រេចនេះដោយនិយាយថា ខ្លួនគាំទ្រយ៉ាងខ្លាំងចំពោះការដោះស្រាយជម្លោះដោយសន្តិវិធី៕
