ព្យុងយ៉ាង៖ជាឆ្លើយតបចំពោះសកម្មភាពយោធារបស់អាមេរិក និងកូរ៉េខាងត្បូង ជាពិសេសការបញ្ជូនយន្តហោះទម្លាក់គ្រាប់បែកនុយក្លេអ៊ែរ B-1B របស់អាមេរិក មកកាន់កូរ៉េខាងត្បូង កូរ៉េខាងជើងបានព្រមានកម្ទេចរដ្ឋធានីសេអ៊ូលឲ្យក្លាយជាផេះ។
ជាមួយគ្នានេះរ៉េខាងជើងក៏បានព្រមានថែមទៀតថា ប្រសិនបើអាមេរិក និងកូរ៉េខាងត្បូង នៅតែបង្កើនការឌឺដងមកលើកូរ៉េខាងជើង ដោយបន្តចល័តយន្តហោះ B-1B នៅលើដែនអាកាសឧបទ្វីបកូរ៉េទៀត យោធាកូរ៉េខាងជើងធានាថា នឹងសម្អាតកោះហ្គាំចេញផ្ទៃផែនដីផងដែរ។
ដោយឡែកអ្នកនាំពាក្យយោធាកូរ៉េខាងជើង លើកឡើងថា ជាការឌឺដងបែបយោធាប្រឆាំង នឹងកូរ៉េខាងជើងបានជំរុញឲ្យស្ថានការណ៍នៅឧបទ្វីបកូរ៉េ ឈានទៅដល់ដំណាក់កាលនៃសង្គ្រាមនុយក្លេអ៊ែរ ដែលមិនអាចគ្រប់គ្រង និងស្រោចស្រង់ឡើងវិញបាន។
គួរបញ្ជាក់ថា បើតាមទីភ្នាក់ងារព័ត៌មានរដ្ឋកូរ៉េខាងជើង KCNA បានផ្សាយថា គ្រាប់នុយក្លេអ៊ែររបស់យោធាកូរ៉ខាងជើង មានសមត្ថភាពអាចនឹងកំទេចទាំងស្រុងនូវរដ្ឋធានីសេអ៊ូល នៃប្រទេសកូរ៉េខាងត្បូងឲ្យក្លាយទៅជាផេះបាន៕
