រាជធានីភ្នំពេញ៖នៅព្រឹកថ្ងៃទី២៣ ខែកញ្ញា ឆ្នាំ២០១៦ នៅនាយកដ្ឋានព្រហ្មទណ្ឌក្រសួងមហាផ្ទៃ បានធ្វើសន្និសីទកាសែតបង្ហាញមុខជនសង្ស័យចំនួន៨នាក់ ដែលពាក់ព័ន្ធករណីបោកគ្រាប់បែកនៅខណ្ឌចំការមន ដោយមានការចូលរួមពីលោកនាយឧត្តមសេនីយ៍ ជួន សុវណ្ណ អគ្គស្នងការរង នគរបាលជាតិ និងជាស្នងការនគរបាលរាជធានីភ្នំពេញ ឧត្តមសេនីយ៍ សុខ ខេមរិន្ទ ប្រធាននាយកដ្ឋានព្រហ្មទណ្ឌ និងមន្ត្រីនគរបាលជំនាញផ្នែកព្រហ្មទណ្ឌផងដែរ ហើយករណីនេះផ្តើមចេញពីរឿងគំនុំ។
ជនសង្ស័យទាំង៨នាក់នោះ រួមមាន៖ ទី១/ឈ្មោះ សាក់ ម៉ាប ភេទប្រុស អាយុ៣៦ឆ្នាំ ជាជនដៃដល់ ទី២/ឈ្មោះ សុខ គឹមលី ភេទស្រី អាយុ៤១ឆ្នាំ មេក្លោង ទី៣/ឈ្មោះ ប៊ុន ភក្តី ភេទប្រុស អាយុ៣២ឆ្នាំ ជនដៃដល់ ទី៤/ឈ្មោះ នី សរ័ប៉ិញ ភេទប្រុស អាយុ៣៦ឆ្នាំ ជនដៃដល់ ទី៥/ឈ្មោះ ចាំង ធីវ៉េ ភេទស្រី អាយុ៤៦ឆ្នាំ អ្នកសមគំនិត ទី៦/ឈ្មោះ ឡេ យាំងយ៉ុង ភេទប្រុស អាយុ៤២ឆ្នាំ ទី៧/ឈ្មោះ នូ សំបាន ភេទប្រុស អាយុ៣៣ឆ្នាំ អ្នកសមគំនិត និងទី៨/ឈ្មោះ ប៊ូ សុភាព ភេទស្រី អាយុ២៥ឆ្នាំ អ្នកសមគំនិត ។
នាយឧត្តមសេនៅយ៍ស្នងការ បានបញ្ជាក់ថា ករណីនេះមានមេក្លោងជាស្ត្រីឈ្មោះ សុខ គឹមលី អាយុ៤១ឆ្នាំ និងបក្ខពួកបានធ្វើសកម្មភាព ចង់សម្លាប់ជនរងគ្រោះ ឈ្មោះ អៀ គឹមលី ដោយលើកទី១ មានគ្នា៤នាក់ ប្រើអាវុធខ្លីកាលពីថ្ងៃទី១៧ ខែមិថុនា ឆ្នាំ២០១៥ តែមិនបាន សម្រច។
ក្រោយមកទើបនៅថ្ងៃទី៦ ខែកញ្ញ ឆ្នាំ២០១៦ បានឲ្យបក្ខពួក៤នាក់ទៀត ធ្វើសកម្មភាពបោកគ្រាប់បែកម្តងទៀត តែមិនបណ្តាលឲ្យ ជនរងគ្រោះ ស្លាប់ ក៏ត្រូវបានកម្លាំងនគរបាលរបស់លោក សហការជាមួយកម្លាំងនាយកដ្ឋានព្រហ្មទណ្ឌក្រសួងមហាផ្ទៃតាមបង្ក្រាប ទាំង៨នាក់តែម្តង។
សូមជំរាបថា នៅម៉ោង៧៖៤០នាទី យប់ថ្ងៃទី៦ ខែកញ្ញា ឆ្នាំ២០១៦ មានករណីភ្ញាក់ផ្អើលមួយ នៅតាមបណ្តោយផ្លូវលេខ១៦៣ សង្កាត់បឹងកេងកងទី៣ ខណ្ឌចំការមន ដោយមានការបំផ្ទុះគ្រាប់បែក មួយគ្រាប់បណ្តាលឲ្យមនុស្ស៤នាក់ រងរបួសធ្ងន់ស្រាល និងបណ្តាលឲ្យរថយន្ត៤គ្រឿង រួមទាំងទ្រព្យសម្បត្តិប្រជាពលរដ្ឋ នៅក្បែរនោះខូចខាតផងដែរ ។ សម្រាប់ជនដៃដល់ និងបក្ខពួកទាំង៨នាក់ ត្រូវបញ្ជូនទៅកាន់តុលាការដើម្បីចាត់ការតាមច្បាប់ ៕
