ស្រវឹងយកពូថៅដេញកាប់អ្នកភូមិស្លាប់ម្នាក់ របួសធ្ងន់២នាក់
ខេត្តព្រះសីហនុ៖មិនដឹងជាកើតរោគអ្វីនោះទេ បុរសកំណាចឃោឃៅម្នាក់ ផឹកស្រាស្រវឹងក៏ស្រាប់តែយកពូថៅដេញកាប់ អ្នកភូមិទាំងកម្រោលបណ្ដាលឱ្យ ស្ត្រីម្នាក់ស្លាប់ និង២នាក់ទៀតរងរបួសធ្ងន់ ។ ប៉ុន្តែកម្លាំងសមត្ថកិច្ចក៏បានចាប់បានភ្លាមៗ ផងដែរ។
ហេតុការណ៍នេះ កើតឡើងនៅល្ងាច ថ្ងៃទី២២ ខែកញ្ញា ឆ្នាំ២០១៦ នៅភូមិត្រពាំងស៊ុយ១ ឃុំអណ្តូងថ្ម ស្រុកព្រៃនប់ ។ ជនសង្ស័យឈ្មោះ ផាន់ ចាន់ឌី អាយុ៣០ឆ្នាំ មុខរបរមិនពិតប្រាកដ មានទីលំនៅនៅកន្លែងកើតហេតុខាងលើ។ ចំណែកជនរងគ្រោះទាំង៣នាក់ មានឈ្មោះទី១.ឈួន ល័ក្រ ភេទស្រី អាយុ៣០ឆ្នាំ (បានស្លាប់) ទី.ឆាយ លីន ភេទស្រី អាយុ១៥ឆ្នាំ (របួសធ្ងន់) និងទី៣.យោង ឆាយ ភេទប្រុស អាយុ៣៦ឆ្នាំ (របួសធ្ងន់) អ្នកទាំង២ត្រូវបានយកទៅសង្គ្រោះនៅមន្ទីរពេទ្យ ក្នុងរាជធានីភ្នំពេញ៕
