ហ្សាការតា៖យ៉ាងហោចណាស់មនុស្សចំនួន២៧នាក់បានស្លាប់បាត់បង់ជីវិត និង២២នាក់ផ្សេងទៀតកំពុងបាត់ខ្លួន ក្នុងគ្រោះទឹកជំនន់ និងការរអិលបាក់ដីយ៉ាងសម្បើមវាយប្រហារខេត្ត West Java ដែលនៅស្ថិតនៅភាគខាងលិចប្រទេសឥណ្ឌូណេស៊ី។ នេះបើយោងតាមសារព័ត៌មានចិន ស៊ិនហួរ ផ្សាយនារសៀលថ្ងៃសុក្រ ទី២៣ ខែកញ្ញា ឆ្នាំ២០១៦នេះ។
អ្នកនាំពាក្យទីភ្នាក់ងារគ្រោះមហន្តរាយធម្មជាតិលោក Sutopo Purwo Nugroho បានឲ្យដឹងថា ខណៈនេះក្រុមជួយសង្គ្រោះកំពុងបន្តស្វែងរកអ្នកដែលកំពុងបាត់ខ្លួនចំនួន២២នាក់ទៀត។ លោកបញ្ជាក់ថា គ្រោះទឹកជំនន់នេះ កើតឡើងនៅតាមទីតាំងមួយចំនួន ក្នុងសង្កាត់ Garut និង បានបណ្តាលឲ្យខូចខាតផ្ទះ ៩៥១ខ្នង។ ជាមួយគ្នានេះដែរ ប៉ូលីស ទាហាន និងភ្នាក់ងារជួយសង្គ្រោះ សរុប១,៦០០នាក់ កំពុងចូលរួមសហការគ្នា ក្នុងប្រតិបត្តិការស្វែងរក និងជួយសង្គ្រោះជនរងគ្រោះនៅក្នុងមហន្តរាយដ៏អាក្រក់នេះ។
លោកបន្ថែមថា គ្រោះទឹកជំនន់នេះក៏បានបណ្តាលឲ្យ មនុស្ស៣២នាក់ទទួលរងបួស និងបានបង្ខំប្រជាពលរដ្ឋឥណ្ឌូណេស៊ីប្រមាណ ៤៣៣គ្រួសារ ឲ្យជម្លៀសខ្លួនទៅរកទីទួលសុវត្ថិភាព ដែលត្រូវបានរៀបចំដោយរដ្ឋាភិបាលផងដែរ។ លោក Sutopo Purwo Nugroho បន្ថែមទៀតថា នៅសង្កាត់ Sumedang វិញ មនុស្សបីនាក់បានស្លាប់ និងម្នាក់ទៀតត្រូវបានជួយសង្គ្រោះទាន់ពេលវេលា បន្ទាប់ការរអិលបាក់ដី បានវាយលុកចំទីតាំងនោះ។ ប្រទេសឥណ្ឌូណេស៊ី តែងទទួលរងការវាយប្រហារដោយ គ្រោះទឹកជំនន់និងការរអិលបាក់ដី ធ្ងន់ធ្ងរនៅពេលដែលមានភ្លៀងធ្លាក់ខ្លាំង៕
