បាល់ទាត់៖ខ្សែបម្រើរបស់ក្រុមមេឃខៀវ Manchester City គឺកីឡាករ Fernandinho ត្រូវបានគេរាយការណ៍ថា នឹងត្រូវបានផ្ដល់នូវកិច្ចសន្យាថ្មីដោយក្រុម Man City បន្ទាប់ពីមានការស្ងើចសរសើរពីសំណាក់លោកគ្រូបង្វឹក Pep Guardiola អំឡុងពេលការដឹកនាំរបស់លោកក្នុងរយៈពេលពីរបីខែកន្លងមកនេះ ។
កីឡាករសញ្ជាតិប្រេស៊ីល វ័យ២៥ឆ្នាំដែលផ្លាស់មកកាន់ពហុកីឡដ្ឋាន Etihad Stadium របស់ក្លិបមេឃខៀវ Manchester City ក្នុងកិច្ចសន្យារយៈពេល៤ឆ្នាំដែលចាកចេញពីក្លិប Shakhtar Donetsk កាលពីឆ្នាំ២០១៣ និងបានបង្ហាញខ្លួនចូលលេងឲ្យក្លិបនៅប្រទេសអង់គ្លេសមួយនេះចំនួន ១០៥លើក ហើយក៏ជាសមាជិកមួយរូបដែលធ្លាប់ជួយឲ្យក្លិបមេឃខៀវ Manchester City ឈ្នះជើងឯក Premier League មួយលើក និងជើងឯក League Cup ចំនួនពីរលើកផងដែរ ។
យោងតាមការចុះផ្សាយរបស់គេហទំព័រ The Mirror បានឲ្យដឹងថា លោកគ្រូបង្វឹក Pep Guardiola គឺជាអ្នកគាំទ្រដ៏ខ្លាំងក្លានៃការផ្ដល់កិច្ចសន្យាថ្មីទៅឲ្យ Fernandinho បន្ទាប់ពីទម្រង់របស់កីឡាកររូបនេះនៅដើមរដូវកាលពិតជាសាកសមជាខ្សែបម្រើដែលអ្នកចាត់ការសញ្ជាតិអេស្ប៉ាញត្រូវការ ហើយក៏កំពុងរក្សាចំណងទំនាក់ទំនងជាមួយ Fernandinho ក្នុងការចុះកិច្ចសន្យាថ្មីនាពេលខាងមុខនេះ ។
គួរបញ្ជាក់ថា ខ្សែបម្រើ Fernandinho នឹងផុតកិច្ចសន្យារបស់ខ្លួននៅចុងបញ្ចប់រដូវកាលនេះដែលមានន័យថា កីឡាកររូបនេះនឹងមិនមានតម្លៃខ្លួនសម្រាប់ការផ្ទេរទៅកាន់ក្លិបបរទេសផ្សេងទៀតនៅខែមករាខាងមុខ ៕
