រាជធានីភ្នំពេញ៖សំណុំរឿងលោក សម រង្ស៊ី ប្រធានគណបក្សសង្គ្រោះជាតិដែលបានចោទប្រកាន់សម្តេចនាយករដ្ឋមន្ត្រីថា បានទិញ Facebook Like ដើម្បីបង្កើនប្រជាប្រិយភាព ត្រូវបានសាលាដំបូងរាជធានីភ្នំពេញសម្រេចលើកពេលសវនាការទៅថ្ងៃទី៨ ខែវិច្ឆិកា ឆ្នាំ២០១៦វិញ ដោយមូលហេតុមេធាវីតំណាងលោក សោម សឿន ដាក់ពាក្យសុំពន្យារពេល និងដោយសារអវត្តមានមេធាវីការពារលោក សម រង្ស៊ី ផងដែរ។
សូមជំរាបថា នៅព្រឹកថ្ងៃទី១៧ ខែតុលានេះ តុលាការក្រុងភ្នំពេញ បានបើកសវនាការសំណុំរឿងលោក សម រង្ស៊ី ប្រធានគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស ដែលចោទប្រកាន់សម្តេចតេជោនាយករដ្ឋមន្ត្រីថា បានទិញ Facebook Like ដើម្បីបង្កើនប្រជាប្រិយភាព លើបណ្ដាញសង្គមដ៏ពេញនិយមមួយនេះ។
សវនាកានោះគឺយោងតាម ពាក្យបណ្ដឹងព្រហ្មទណ្ឌ ចុះថ្ងៃទី១០ ខែមីនា ឆ្នាំ២០១៦ លោក សោម សឿន អាយុ៦៤ឆ្នាំ ជារដ្ឋមន្ត្រីអមនាយករដ្ឋមន្ត្រី បានប្តឹងលោក សម រង្ស៊ី អាយុ៦៧ឆ្នាំ ប្រធានគណបក្សសង្គ្រោះជាតិ ដោយភ្ជាប់ការបង្ហោះផ្សាយព័ត៌មានលើទំព័រហ្វេសប៊ុករបស់លោក សម រង្ស៊ី កាលពីថ្ងៃទី៩ ខែមីនា ឆ្នាំ២០១៦៕
