បញ្ជូនឃាតករសម្លាប់ក្មេងស្រីយកក្រវិលកាឡៃទៅតុលាការ
ខេត្តកែប៖លោកឧត្តមសេនីយ៍ត្រី អ៊ីង សំអុល ស្នងការនគរបាលខេត្តកែបបានឲ្យដឹងថា នៅព្រឹកថ្ងៃទី២១ ខែតុលា ឆ្នាំ២០១៦នេះ កម្លាំងនគរបាលនៃស្នងការដ្ឋាននគរបាលខេត្តកែបបានបញ្ជូនជនសង្ស័យម្នាក់ដែលប្លន់សម្លាប់ក្មេងស្រី អាយុ៧ឆ្នាំម្នាក់ យកក្រវិលកាឡៃតម្លៃ២,៥០០រៀល នៅសាលាដំបូងខេត្តកំពត។
គួរបញ្ជាក់ថា កាលពីថ្ងៃត្រង់ ថ្ងៃទី១៦ ខែតុលា ឆ្នាំ២០១៦កន្លងទៅនេះ មានករណីប្លន់សម្លាប់ក្មេងស្រី យកក្រវិលកាឡៃមួយគូរ តម្លៃ២,៥០០រៀល នៅចំណុចចំការចុង ភូមិពីខាងជើងផ្លូវរថភ្លើង ក្នុងភូមិដំណាក់ចង្អើរ សង្កាត់ព្រៃធំ ក្រុងកែប ដោយជនរងគ្រោះឈ្មោះ អែម លីហ្សា អាយុ៧ឆ្នាំ ជាកូនរបស់ឈ្មោះ អែម វិចិត្រ និងប្រពន្ធឈ្មោះ ទ្រី ចិន រស់នៅភូមិកើតហេតុខាងលើ៕
