ព្រះសីហនុ៖ ប្រធានស្នាក់ការគយរដ្ឋាករប្រចាំកំពង់ផែអន្តរជាតិខេត្តព្រះសីហនុ លោក គិន លី កំពុងរងការិះគន់ជុំវិញអំពើពុករលួយក្នុងការប្រមូលលុយក្រៅប្រព័ន្ធពន្ធដាររបស់រដ្ឋពីក្រុមឈ្មួញរកស៊ីដឹកឈើខុសច្បាប់ទៅលក់នៅបរទេស និងពីថៅកែទំនិញធំៗជាច្រើនទៀតឥតលើកលែងឡើយ។
ប្រភពព័ត៌មានពីមន្ត្រីកំពង់ផែមួយរូបសុំមិនបញ្ចេញឈ្មោះបានប្រាប់ឲ្យដឹងថា ក្រោយពេលលោក គិន លី ចូលមកកាន់តំណែងគ្រប់គ្រងផែអន្តរជាតិសាជាថ្មី គេសង្កេតឃើញការប្រមូលលុយក្រោមតុរបស់ មន្ត្រីគយក្រោមឱវាទលោក គិន លី មានសកម្មភាពកាន់តែពុះកញ្ជ្រោលជាងពេលមុនៗ។សូម្បីតែ ឡានដឹកទំនិញចេញពីកំពង់ផែខេត្តព្រះសីហនុ ក៏សុទ្ធតែជាប់កាតព្វកិច្ចបង់លុយក្បាលឡានឱ្យមន្ត្រីគយរបស់លោកមេគយ គិន លី យ៉ាងហោចណាស់រថយន្តមួយគ្រឿងរាប់ពាន់ដុល្លារអាមេរិកដែរដែលប្រាក់ទាំងនោះត្រូវគេសង្ស័យថាមិនបានបង់ចូលជាថវិកាជាតិនោះទេគឺលោក គិន លី បានប្រមូលយកទៅច្រកហោប៉ៅធ្វើមានធ្វើបានផ្ទាល់ខ្លួនយ៉ាងយរំភើយ ចំណែកថ្នាក់លើមិនដែលរវវីរវល់ករណីពុក រលួយនៅកំពង់ផែព្រះសីហនុ ក្រោមការដឹកនាំរបស់លោក គិន លី នោះឡើយ។
គួរជម្រាបថា លោកមេគយរូបនេះធ្លាប់មានស្លាកស្នាមអាស្រូវដ៏ធំនាពេលកន្លងមកពាក់ព័ន្ធនឹងករណី អនុញ្ញាតឲ្យនាំចូលកាកសំណល់សារធាតុគីមីពុល។
មន្ត្រីមួយចំនួនទៀតបានបង្ហើបឱ្យដឹងថា បច្ចុប្បន្ននេះការដឹកជញ្ជូនឈើប្រណីតមានបេង ធ្នង់ គ្រញូង ជាដើម ត្រូវបានឈ្មួញធំៗរៀបចំដាក់ក្នុងកុងតឺន័រដើម្បីបញ្ជូនទៅស្រុកចិន ដោយផ្ទាល់ មិនចាំបាច់ដឹកឆ្លងកាត់ស្រុក យួនដែលកំពុងតែមានជម្លោះព្រំដែន ជាមួយចិនក៏ចម្រូងចម្រាស់នោះទេ ។ ការរកស៊ីដឹកជញ្ជូនឈើខុសច្បាប់ចេញ ទៅស្រុកចិន អាចប្រើប្រាស់តាមច្រកកំពង់ផែអន្តរជាតិខេត្តព្រះសីហនុ ដែលនៅទីនោះមានអ្នកបោះមេស្តាយលុយ យកទៅបែងចែកមន្ត្រីជំនាញ និងសមត្ថកិច្ចពាក់ព័ន្ធទៅតាមតម្លៃដែលបានចរចាគ្នា គឺគេបង់ទៅតាមចំនួនកុងតឺន័រ ធ្វើឱ្យមន្ត្រី និងសមត្ថកិច្ចដែលមានមុខប្រចាំការនៅច្រកកំពង់ផែអន្តរជាតិ ខេត្តព្រះសីហនុ សុខស្រួលក្នុងការរាប់កុងតឺន័រយកលុយយ៉ាងរំភើយ មិនដែលខ្វល់ពីការព្រមានរបស់ប្រមុខរាជរដ្ឋាភិបាលឡើយ ។
ប្រភពដដែលបន្តថា សកម្មភាពដឹកជញ្ជូនឈើប្រណីតចេញទៅស្រុកចិន និងទៅប្រទេសផ្សេងទៀត តាមរថយន្តកុងតឺន័រ ដោយប្រើប្រាស់ច្រកកំពង់ផែអន្តរជាតិខេត្តព្រះសីហនុ កាន់តែគគ្រឹកគគ្រេងប៉ុន្តែមន្ត្រីជំនាញ និងសមត្ថកិច្ចពាក់ព័ន្ធបានឃុបឃិតគ្នាប្រមួលផលប្រយោជន៍យកទៅច្រកហោប៉ៅធ្វើមានបានផ្ទាល់ខ្លួន និងទុកសម្រាប់យកទៅតូថ្នាក់លើដើម្បីរក្សាមុខតំណែង និងរួចផុតពីទោស ។
ប្រភពបន្តទៀតថា បញ្ហាដែលបែកធ្លាយរឿងពុករលួយចេញមកក្រៅពាក់ព័ន្ធការនាំចេញឈើប្រណីតតាមច្រក កំពង់ផែអន្តរជាតិខេត្តព្រះសីហនុនេះ ផ្តើមឡើងដោយសារតែក្រុមឈ្មួញបានកាន់លុយដុំយកទៅបង់ជូនមេៗ គ្រប់អង្គភាពស្ថាប័នហើយមិនបានបែងចែកឱ្យមន្ត្រីតូចតាចឥឲ្យគ្នាបានរស់ផងទេ ទើបត្រូវបានបែកថ្លាយចេញមកក្រៅធ្វើឱ្យសាធារណ ជនមានការភ្ញាក់ផ្អើលយ៉ាងខ្លាំង ។
ប្រភពបន្តថា ជាការកត់សម្គាល់រថយន្តសណ្តោងកុងតឺន័រដឹកឈើប្រណីត ចូលច្រកកំពង់ផែអន្តរជាតិ ខេត្តព្រះសីហនុ គេប្រើប្រាស់ទ្រុងកុងតឺន័រពណ៌ខៀវ រថយន្តមានក្បាលពណ៌ និងមានស្លាកសម្គាល់នៅពីមុខកញ្ចក់គ្រាន់តែបើកទៅដល់ច្រកកំពង់ផែភ្លាមអ្នកកាន់ប៉ារ៉ាស់បានចាត់ការបើកប៉ារ៉ាស់ យ៉ាងលឿនឱ្យរថយន្តកុងតឺន័រដឹកឈើទាំងនេះ បើទៅកាន់ផែដោយគ្មានការត្រួតពិនិត្យនោះទេ ហើយកុងតឺន័រឈើក៏ត្រូវគេស្ទូចយកទៅដាក់នៅលើកប៉ាល់ភ្លាមៗមិនបង្អង់នាំឱ្យបែកការណ៍នោះឡើយ ។
ប្រភពបន្តថា សកម្មភាពតាមច្រកកំពង់ផែអន្តរជាតិ ក្នុងមួយថ្ងៃៗប្រមាណ ៣០កុងតឺន័រ បើគិតជាលុយ គឺរាប់សិបលានដុល្លារឯណោះ បើតាមការវាយតម្លៃត្រួសៗក្នុងកុងតឺន័រមួយគ្រឿង ឈើប្រណិតអាចមានតម្លៃជិត ២លានដុល្លារ ប៉ុន្តែប្រាក់ចំណូលទាំងនោះហូរធ្លាក់ចូលហោប៉ៅឈ្មួញទុច្ចរិត និងមន្ត្រីពុករលួយប៉ុណ្ណោះមិនបានជាប្រយោជន៍ជាតិនោះទេ ។
មជ្ឈដ្ឋានមួយចំនួនបានទម្លាក់កំហុសទៅលោក អ៊ុក រ៉ាប៊ុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ និងលោកមេគយធំ ប៉ែន ស៊ីម៉ន ថា ធ្វេសប្រហែសក្នុងការដឹកនាំ ចាំតែស្តាប់របាយការណ៍ភូតពីមន្ត្រីខិលខូច ហើយមិនពិនិត្យមើលសកម្មភាពពុករលួយក្នុងអង្គភាពកំពង់ផែកម្រិតអន្តរជាតិដ៏ធំបំផុតរបស់ប្រទេសដែលមិនគួរបណ្តែតបណ្តោយឱ្យក្រុមឈ្មួញ និងមន្ត្រីខិលខូចធ្វើអ្វីៗតាមតែអំពើចិត្តបែបនេះទេ ។
លោក គិន លី ប្រធានស្នាក់ការគយរដ្ឋាករប្រចាំច្រកកំពង់ផែអន្តរជាតិខេត្ត ព្រះសីហនុ មិនអាចទាក់ទងសុំការពន្យល់ពាក់ព័ន្ធនឹងការរិះគន់ដូចខាងលើបានទេកាលពីរសៀលម្សិលមិញនេះ៕
