រាជធានីភ្នំពេញ៖យោងតាមសេចក្តីរាយការណ៍បានឲ្យដឹងថា កម្មករ កម្មការិនី ២០នាក់របួសធ្ងន់ ក្នុងនោះមានស្ត្រីពោះធំ ២នាក់ និង១០នាក់ផ្សេងទៀត បានរងរបួសស្រាលក្នុងគ្រោះថ្នាក់ក្រឡាប់រថយន្តដឹកកម្មករនៅតាមផ្លូវជាតិលេខ៦ ក្នុងសង្កាត់ព្រែកលាប ខណ្ឌឫស្សីកែវនាវេលាម៉ោង៦ និង៣០នាទីព្រឹកថ្ងៃទី២៧ ខែតុលា ឆ្នាំ២០១៦នេះក្នុងសង្កាត់ព្រែកលាប ខណ្ឌឫស្សីកែវ ស្ពានទី៩ ។
សមត្ថកិច្ចបានបញ្ជាក់ថា នៅមុនពេលកើតហេតុរថយន្តកូរ៉េ ដែលដឹកកម្មករប្រមាណ ៦០នាក់ បានព្យាយាមបើកជែងម៉ូតូកង់បី ក្នុងល្បឿនលឿននោះ ក៏បណ្តាលឲ្យរថយន្តក្រឡាប់ចាក់កម្មករនៅលើផ្លូវតែម្តង។
ក្រុមកម្មករត្រូវបានប្រជាពលរដ្ឋនៅកន្លែងកើតហេតុអះអាងថា ពួកគេរស់នៅព្រែកអញ្ចាញបម្រើការនៅរោងចក្រ ៦ជាន់ ស្ថិតនៅជិតស្ពានទី៦។ ទោះបីជាយ៉ាងណា ក្រោយកើតហេតុភ្លាមៗកងកម្លាំងសមត្ថកិច្ច បានញាប់ដៃញាប់ជើងបញ្ជូនជនរងគ្រោះទៅកាន់មន្ទីរពេទ្យអស់ហើយ ដើម្បីជួយសង្គ្រោះ៕
